എറണാകുളം: മയക്കുമരുന്ന് കേസുകളിൽ സ്വമേധയാ അല്ലാതെ, അന്വേഷണ ഉദ്യോഗസ്ഥന്റെ നിർദ്ദേശപ്രകാരമോ ഭയപ്പെടുത്തിയതിനാലോ പ്രതി തന്റെ വസ്ത്രത്തിനുള്ളിൽ നിന്നോ ശരീരത്തിൽ നിന്നോ ലഹരിവസ്തുക്കൾ എടുത്ത് നൽകുന്നത് നിയമപരമായി ‘ശരീര പരിശോധന’ (Personal Search) ആയി തന്നെ കണക്കാക്കണമെന്ന് കേരള ഹൈക്കോടതി വ്യക്താമാക്കി. എൻ.ഡി.പി.എസ് (NDPS) ആക്ട് സെക്ഷൻ 50 പ്രകാരമുള്ള ഗസറ്റഡ് ഓഫീസറുടെയോ മജിസ്‌ട്രേറ്റിന്റെയോ സാന്നിധ്യത്തിൽ പരിശോധന നടത്താനുള്ള അവകാശത്തെക്കുറിച്ച് പ്രതിയെ ബോധ്യപ്പെടുത്തിയിട്ടില്ലെങ്കിൽ വിചാരണ തടവുകാർക്ക് ജാമ്യം അനുവദിക്കാമെന്നും കോടതി ഉത്തരവിട്ടു.

ബഹുമാനപ്പെട്ട ജസ്റ്റിസ് ഡോ. കൗസർ എടപ്പഗത്തിന്റെ ബെഞ്ചാണ് മൂന്ന് വെവ്വേറെ ജാമ്യാപേക്ഷകൾ (BA No. 2821/2026, 3224/2026, 3851/2026) പരിഗണിച്ചുകൊണ്ട് ഈ നിർണ്ണായക ഉത്തരവ് പുറപ്പെടുവിച്ചത് (2026:KER:57581).

നിയമപരമായ സുപ്രധാന കണ്ടെത്തലുകൾ:

• ‘Implied Search’ (അനുമാനപരമായ പരിശോധന): പരിശോധനാ ഉദ്യോഗസ്ഥൻ നിർദ്ദേശിക്കുകയോ ആവശ്യപ്പെടുകയോ ചെയ്ത്, അതിൻപ്രകാരം പ്രതി സ്വന്തം കസ്റ്റഡിയിലുള്ള ലഹരി എടുത്തു നൽകിയാൽ അത് കേവലം ഒരു സമർപ്പണമല്ല (Voluntary Production). മറിച്ച് അത് നിയമപരമായി ശരീര പരിശോധന തന്നെയാണ്.
• സ്വമേധയാ ഉള്ള കൈമാറ്റം (Spontaneous Voluntary Production): എന്നാൽ ഉദ്യോഗസ്ഥരുടെ യാതൊരുവിധ ഇടപെടലുമില്ലാതെ, ചോദ്യം ചെയ്യലോ ആവശ്യമോ ഇല്ലാതെ പ്രതി സ്വയം മുൻകൈയെടുത്ത് ലഹരി എടുത്തു നൽകുകയാണെങ്കിൽ സെക്ഷൻ 50 ബാധകമാകില്ല.
• രഹസ്യവിവരവും ആകസ്മിക പരിശോധനയും (Prior Information vs Chance Recovery): ലഹരി കടത്തുന്നതായി മുൻകൂട്ടി വിവരം ലഭിച്ച സന്ദർഭങ്ങളിൽ മാത്രമല്ല, സാധാരണ പരിശോധനയിൽ ആകസ്മികമായി ലഹരിവസ്തുക്കൾ കണ്ടെത്താനുള്ള സാധ്യത തെളിയുമ്പോൾ മുതൽ ഉദ്യോഗസ്ഥർ സെക്ഷൻ 50 നിർബന്ധമായും പാലിച്ചിരിക്കണം.

ഹൈക്കോടതി പരിഗണിച്ച കേസുകളും വിധികളും:

ജാമ്യം ലഭിച്ച പ്രതികൾ ഒരു ലക്ഷം രൂപയുടെ ബോണ്ടും തുല്യതുകയ്ക്കുള്ള രണ്ട് ആൾജാമ്യവും ഹാജരാക്കണം. അന്വേഷണവുമായി സഹകരിക്കണമെന്നും എല്ലാ ശനിയാഴ്ചകളിലും അന്വേഷണ ഉദ്യോഗസ്ഥർക്ക് മുന്നിൽ ഹാജരാകണമെന്നും സമാന കുറ്റകൃത്യങ്ങളിൽ ഏർപ്പെടരുതെന്നും കോടതി കർശന വ്യവസ്ഥകൾ ഏർപ്പെടുത്തിയിട്ടുണ്ട്.