കൊച്ചി: എക്സൈസ് ഉൾപ്പെടെയുള്ള സ്റ്റാറ്റ്യൂട്ടറി അധികാരികൾ നടത്തുന്ന അറസ്റ്റും തുടർനടപടിക്രമങ്ങളും സംബന്ധിച്ച് സത്യസന്ധമായി വാർത്ത നൽകിയാൽ മാധ്യമപ്രവർത്തകർക്കെതിരെ കുറ്റകരമായ മാനനഷ്ടക്കേസ് (Criminal Defamation) നിലനിൽക്കില്ലെന്ന് കേരള ഹൈക്കോടതി. അപകീർത്തിപ്പെടുത്തണമെന്ന ദുരുദ്ദേശ്യം (Mens Rea) തെളിയിക്കപ്പെടാത്ത പക്ഷം, വിവരങ്ങളുടെ അടിസ്ഥാനത്തിൽ നൽകുന്ന വാർത്തകൾക്കെതിരെ കേസെടുക്കുന്നത് നിയമനടപടികളുടെ ദുരുപയോഗമാണെന്ന് കോടതി നിരീക്ഷിച്ചു.

മലയാള മനോരമ ചീഫ് എഡിറ്റർ മാമ്മൻ മാത്യു, എഡിറ്റർ, ലേഖകൻ എന്നിവർക്കെതിരെ ആലുവ മജിസ്ട്രേറ്റ് കോടതിയിലുണ്ടായിരുന്ന സി.സി. നമ്പർ 281/2023 കേസിലെ നടപടികൾ പൂർണ്ണമായി റദ്ദാക്കിക്കൊണ്ടാണ് ജസ്റ്റിസ് സി.എസ്. ഡയസിന്റെ സുപ്രധാന ഉത്തരവ് (2026 (8) KLR 50).

കേസിന് ആസ്പദമായ സംഭവം

2020 ഓഗസ്റ്റ് 17-ന് പറവൂർ സിവിൽ എക്സൈസ് സംഘം രണ്ടാമത്തെ എതിർകക്ഷിയെ മദ്യവുമായി അറസ്റ്റ് ചെയ്ത് കേസ് രജിസ്റ്റർ ചെയ്തിരുന്നു (Crime No. 24/2020). സ്കൂട്ടറിൽ 2.5 ലിറ്റർ വിദേശമദ്യം കടത്തിയെന്നായിരുന്നു എക്സൈസ് ഒക്കറൻസ് റിപ്പോർട്ട്.

തുടർന്ന് പിറ്റേന്ന് മലയാള മനോരമ പത്രത്തിൽ പ്രതിയുടെ ചിത്രമടക്കം വാർത്ത അച്ചടിച്ചുവന്നു. എന്നാൽ, വാർത്തയിൽ 3 ലിറ്റർ മദ്യമെന്നും യുവാക്കൾക്കും അതിഥി തൊഴിലാളികൾക്കും ഫോൺ വഴി ഓർഡർ സ്വീകരിച്ച് മദ്യം വിൽപന നടത്തുന്നയാളാണെന്നും അച്ചടിച്ചുവന്നത് തനിക്ക് അപമാനമുണ്ടാക്കിയെന്നും തന്നെ പിന്നീട് കേസിൽ വെറുതെവിട്ടുവെന്നും കാട്ടി പ്രതി മജിസ്ട്രേറ്റ് കോടതിയിൽ മാനനഷ്ടക്കേസ് ഫയൽ ചെയ്യുകയായിരുന്നു.

കോടതിയുടെ സുപ്രധാന കണ്ടെത്തലുകൾ

ഐ.പി.സി 499-ാം വകുപ്പ് അപകീർത്തികരമായ എല്ലാ അച്ചടി പ്രസിദ്ധീകരണങ്ങളെയും കുറ്റകൃത്യമാക്കുന്നില്ലെന്ന് ഹൈക്കോടതി ചൂണ്ടിക്കാട്ടി. കുറ്റം നിലനിൽക്കണമെങ്കിൽ ചുവടെ പറയുന്ന ഘടകങ്ങൾ അത്യന്താപേക്ഷിതമാണ്:

1. സദ്ഉദ്ദേശ്യവും മെൻസ് റിയയും: വ്യക്തിയെ അപമാനിക്കണമെന്ന ഉദ്ദേശ്യത്തോടെയോ (Mens Rea) അതിന് സാധ്യതയുണ്ടെന്ന അറിവോടെയോ മാത്രമായിരിക്കണം വാർത്ത നൽകേണ്ടത്.
2. നാലാം അപവാദം (Fourth Exception): കോടതി നടപടികളുടെ റിപ്പോർട്ടിംഗിന് ഐ.പി.സി 499-ന്റെ നാലാം അപവാദം സംരക്ഷണം നൽകുന്നുണ്ട്. ഇതേ തത്വം എക്സൈസ്/പോലീസ് തുടങ്ങിയ സ്റ്റാറ്റ്യൂട്ടറി ബോഡികളുടെ വിവരങ്ങൾ സദ്ഉദ്ദേശ്യത്തോടെ നൽകുന്നതിനും ബാധകമാണ്.
3. വസ്തുതാപരമായ ചെറിയ വ്യത്യാസങ്ങൾ: എക്സൈസ് ഒക്കറൻസ് റിപ്പോർട്ടിൽ 2.5 ലിറ്റർ എന്നതിന് പകരം വാർത്തയിൽ 3 ലിറ്റർ എന്ന് വന്നതുകൊണ്ട് മാത്രം പത്രപ്രവർത്തകർ ദുരുദ്ദേശ്യത്തോടെ വാർത്ത വ്യാജമായി നിർമ്മിച്ചതാണെന്ന് കരുതാനാവില്ല.

സെക്ഷൻ 482 CrPC പ്രകാരമുള്ള ഹൈക്കോടതിയുടെ അപരിമിതമായ അധികാരം ഉപയോഗിച്ച്, ഹർജിക്കാർക്കെതിരായ ക്രിമിനൽ പരാതിയും തുടർനടപടികളും പൂർണ്ണമായി റദ്ദാക്കിക്കൊണ്ട് ഹൈക്കോടതി ഉത്തരവിട്ടു.