ബി.എഡ് ബിരുദധാരിയായ അധ്യാപകന് എൽ.പി സ്കൂൾ ഹെഡ്മാസ്റ്ററാകാം: ഹൈക്കോടതി നിർണ്ണായക വിധി
2023 ഓഗസ്റ്റ് 11-ന് മുൻപുള്ള നിയമനങ്ങൾക്ക് സംരക്ഷണം; ജിഷ എം.വി. നൽകിയ റിട്ട് അപ്പീൽ തള്ളി ഡിവിഷൻ ബെഞ്ച്
എറണാകുളം: ലോവർ പ്രൈമറി (എൽ.പി) സ്കൂളുകളിൽ ബി.എഡ് യോഗ്യതയുള്ള അധ്യാപകരെ ഹെഡ്മാസ്റ്ററായി നിയമിക്കുന്നതിന് തടസ്സമില്ലെന്ന് ഹൈക്കോടതി ഡിവിഷൻ ബെഞ്ച് ഉത്തരവിട്ടു. സുപ്രീം കോടതിയുടെ ‘ദേവേശ് ശർമ്മ’ കേസിലെ ചരിത്രപരമായ വിധി നിലവിൽ വന്ന 2023 ഓഗസ്റ്റ് 11-ന് മുൻപ് നടന്ന നിയമനങ്ങൾ പൂർണ്ണമായും സംരക്ഷിക്കപ്പെടുമെന്ന് കോടതി വ്യക്തമാക്കി.
കണ്ണൂർ പാപ്പിനിശ്ശേരി എൽ.പി. സ്കൂളിലെ അസിസ്റ്റന്റ് അധ്യാപിക ജിഷ എം.വി. സമർപ്പിച്ച റിട്ട് അപ്പീൽ (W.A. No. 3136/2025) പൂർണ്ണമായും തള്ളിക്കൊണ്ടാണ് ജസ്റ്റിസ് അനിൽ കെ. നരേന്ദ്രൻ, ജസ്റ്റിസ് മുരളി കൃഷ്ണ എസ്. എന്നിവരടങ്ങിയ ഡിവിഷൻ ബെഞ്ച് വിധ പ്രസ്താവിച്ചത്.
കേസിന്റെ പശ്ചാത്തലം:
പാപ്പിനിശ്ശേരി എൽ.പി. സ്കൂളിൽ 2005 ജൂൺ 1 മുതൽ അറബിക് അധ്യാപകനായി സേവനമനുഷ്ഠിച്ചു വരികയായിരുന്ന നജ്മുദ്ദീൻ കെ.പി.-യെ 2022 ജൂൺ 14-ന് സ്കൂളിലെ മുൻ എച്ച്.എം വിരമിച്ചതിനെ തുടർന്ന് എച്ച്.എം ആയി മാനേജർ നിയമിക്കുകയും എ.ഇ.ഒ എച്ച്.എം ചുമതല നൽകുകയും ചെയ്തു. കാലിക്കറ്റ് യൂണിവേഴ്സിറ്റിയിൽ നിന്ന് ബി.എ (അഫ്സൽ-ഉൽ-ഉലമ), ബി.എഡ്, കെ-ടെറ്റ് (KTET), അക്കൗണ്ട് ടെസ്റ്റ് യോഗ്യതകൾ ഇദ്ദേഹത്തിനുണ്ടായിരുന്നു.
എന്നാൽ, എൽ.പി. സ്കൂൾ എച്ച്.എം ആകാൻ ടി.ടി.സി (TTC) യോഗ്യത വേണമെന്നും, ബി.എഡ് യോഗ്യതയുള്ളവർക്ക് എച്ച്.എം ആകാൻ കഴിയില്ലെന്നും ചൂണ്ടിക്കാട്ടി അസിസ്റ്റന്റ് എഡ്യൂക്കേഷണൽ ഓഫീസർ (AEO) അപ്രൂവൽ തടഞ്ഞു. ഇതിനെതിരെ നജ്മുദ്ദീൻ നൽകിയ ഹർജിയിൽ സിംഗിൾ ബെഞ്ച് ഇദ്ദേഹത്തിന് അനുകൂലമായി ഉത്തരവിട്ടു. ഇതിനെതിരെയാണ് അധ്യാപികയായ ജിഷ എം.വി അപ്പീലുമായി ഡിവിഷൻ ബെഞ്ചിനെ സമീപിച്ചത്.
കെ.ഇ.ആർ (KER) ചട്ടങ്ങളുടെ പ്രസക്തി:
കേരള വിദ്യാഭ്യാസ ചട്ടങ്ങളിലെ (KER) ചാപ്റ്റർ XXXI റൂൾ 4(2) പ്രകാരം അറബിക് അധ്യാപകർക്ക് ബിരുദം മതിയായ യോഗ്യതയാണ്. കൂടാതെ ചാപ്റ്റർ XIV (A) റൂൾ 45A പ്രകാരം, എച്ച്.എം തസ്തികയിലേക്ക് പ്രൈമറി സ്കൂൾ അസിസ്റ്റന്റ് നിയമനത്തിനുള്ള തുല്യ പരിശീലന യോഗ്യതയുള്ളവരെ പരിഗണിക്കാവുന്നതാണ്. യു.പി.എസ്.എ (UPSA) തസ്തികയ്ക്ക് ബി.എഡ് അംഗീകൃത യോഗ്യതയായതിനാൽ എൽ.പി. സ്കൂൾ എച്ച്.എം തസ്തികയ്ക്കും ഇത് ബാധകമാണെന്ന് കോടതി വിലയിരുത്തി.
സുപ്രീം കോടതി വിധികളുടെ വിശകലനം:
‘ദേവേശ് ശർമ്മ v. യൂണിയൻ ഓഫ് ഇന്ത്യ’ (AIR 2023 SC 3895) കേസിൽ പ്രൈമറി സ്കൂളുകളിൽ ബി.എഡ് അധ്യാപകരെ നിയമിക്കുന്നത് സുപ്രീം കോടതി റദ്ദാക്കിയിരുന്നുവെങ്കിലും, ‘നവീൻ കുമാർ v. യൂണിയൻ ഓഫ് ഇന്ത്യ’ (AIR 2024 SC 4748) കേസിലെ പശ്ചാത്തലത്തിൽ 2023 ഓഗസ്റ്റ് 11-ന് മുൻപ് നിയമനം ലഭിച്ചവരുടെ തസ്തിക സുരക്ഷിതമാണെന്ന് വിധി പ്രസ്താവിച്ചിട്ടുണ്ട്.
നജ്മുദ്ദീൻ കെ.പി.-യുടെ എച്ച്.എം നിയമനം 2022 ജൂണിൽ നടന്നതായതിനാൽ സുപ്രീം കോടതി വിധി ഇദ്ദേഹത്തിന്റെ തസ്തികയെ പ്രതികൂലമായി ബാധിക്കില്ലെന്ന് ഡിവിഷൻ ബെഞ്ച് വ്യക്തമാക്കി. മുൻ സിംഗിൾ ബെഞ്ച് ഉത്തരവിൽ യാതൊരുവിധ നിയമപരമായ തെറ്റുമില്ലെന്ന് വ്യക്തമാക്കിക്കൊണ്ട് അപ്പീൽ ഹർജി പൂർണ്ണമായും തള്ളി.