ചാർജ്ഷീറ്റിലെ സാങ്കേതിക പിഴവ് തിരുത്താൻ വൈകിയാലും പ്രതിക്ക് ‘സ്വാഭാവിക ജാമ്യം’ ലഭിക്കില്ല
നിശ്ചിത സമയത്തിനകം അന്തിമ റിപ്പോർട്ട് സമർപ്പിച്ചാൽ മതിയാകും; അനുബന്ധ രേഖകളിലെ ക്ലറിക്കൽ തെറ്റുകൾ തിരുത്തി വീണ്ടും സമർപ്പിക്കുന്നത് ആദ്യ തീയതിയിലേക്ക് ബാധകമെന്ന് ജസ്റ്റിസ് ഡോ. കൗസർ എടപ്പഗത്ത്.
അന്വേഷണം പൂർത്തിയാക്കി നിശ്ചിത കാലാവധിക്കുള്ളിൽ കോടതിയിൽ അന്തിമ റിപ്പോർട്ട് (കുറ്റപത്രം) സമർപ്പിച്ചിട്ടുണ്ടെങ്കിൽ, അതിലെ സാങ്കേതികമോ ക്ലറിക്കലോ ആയ ചെറിയ പിഴവുകൾ തിരുത്താൻ വൈകിയെന്ന കാരണത്താൽ പ്രതിക്ക് സ്വാഭാവിക ജാമ്യത്തിന് (Default Bail / Statutory Bail) അർഹതയുണ്ടാകില്ലെന്ന് കേരള ഹൈക്കോടതി വ്യക്തമാക്കി. ഭാരതീയ നാഗരിക് സുരക്ഷാ സംഹിത (BNSS) സെക്ഷൻ 187(2), 193(3) എന്നിവ പ്രകാരം അന്വേഷണം കൃത്യസമയത്ത് പൂർത്തിയായതായി സാക്ഷ്യപ്പെടുത്തിക്കൊണ്ടുള്ള റിപ്പോർട്ട് ഫയൽ ചെയ്തിട്ടുണ്ടെങ്കിൽ ജാമ്യത്തിനായുള്ള അവകാശം ഇല്ലാതാകുമെന്ന് ജസ്റ്റിസ് ഡോ. കൗസർ എടപ്പഗത്ത് ഉത്തരവിട്ടു.
ചേളന്നൂർ എക്സൈസ് റേഞ്ച് രജിസ്റ്റർ ചെയ്ത മയക്കുമരുന്ന് കേസിൽ (ക്രൈം നമ്പർ: 20/2026) റിമാൻഡിൽ കഴിയുന്ന കോഴിക്കോട് സ്വദേശി സാഗേഷ് സമർപ്പിച്ച രണ്ടാം ജാമ്യാപേക്ഷ തള്ളിക്കൊണ്ടാണ് ഹൈക്കോടതിയുടെ ഈ നിർണ്ണായക ഉത്തരവ്. പ്രതിയുടെ പക്കൽനിന്ന് 11.78 ഗ്രാം മെത്താംഫെറ്റമിൻ (Methamphetamine) പിടിച്ചെടുത്തെന്നായിരുന്നു കേസ്. എൻ.ഡി.പി.എസ് നിയമത്തിലെ സെക്ഷൻ 22(b) പ്രകാരമുള്ള കുറ്റമാണിത്.
കോടതിയുടെ പ്രധാന നിരീക്ഷണം:
“ഭരണഘടനയുടെ അനുച്ഛേദം 21 അനുശാസിക്കുന്ന വ്യക്തിസ്വാതന്ത്ര്യത്തിന്റെ ഭാഗമാണ് സ്വാഭാവിക ജാമ്യം എന്നതിൽ സംശയമില്ല. എന്നാൽ ഇത് അന്വേഷണം അപൂർണ്ണമായിരിക്കുമ്പോൾ മാത്രമാണ് ബാധകമാകുന്നത്. ബി.എൻ.എസ്.എസ് സെക്ഷൻ 193(3) വ്യവസ്ഥകൾക്കനുസൃതമായി കൃത്യമായ കാലാവധിക്കുള്ളിൽ കുറ്റപത്രം ഫയൽ ചെയ്താൽ ആ നിമിഷം മുതൽ പ്രതിയുടെ സ്വാഭാവിക ജാമ്യാവകാശം ഇല്ലാതാകുന്നു.”
കേസിന്റെ നാൾവഴികളും പ്രതിഭാഗത്തിന്റെ വാദവും
2026 ജൂൺ 8-നാണ് പ്രതി സാഗേഷ് അറസ്റ്റിലായത്. എൻ.ഡി.പി.എസ് നിയമത്തിലെ വകുപ്പ് 22(b) പ്രകാരം പരമാവധി 10 വർഷം വരെ തടവുശിക്ഷ ലഭിക്കാവുന്ന കുറ്റമായതിനാൽ, 60 ദിവസത്തിനകം കുറ്റപത്രം സമർപ്പിക്കേണ്ടതുണ്ട് (അബൂബക്കർ സിദ്ദിഖ് v. സ്റ്റേറ്റ് ഓഫ് കേരള, 2026 വിധി പ്രകാരം).
നിശ്ചിത 60 ദിവസ കാലാവധി തികയുന്നതിനു മുൻപ് തന്നെ, അതായത് 2026 ജൂലൈ 21-ന് അന്വേഷണ ഉദ്യോഗസ്ഥൻ കോടതിയിൽ അന്തിമ റിപ്പോർട്ട് നൽകി. എന്നാൽ, ലിസ്റ്റിൽ രേഖപ്പെടുത്തിയ ഒരു രേഖ ഉൾപ്പെടുത്താതിരുന്നതിനാലും മറ്റ് ചില ക്ലറിക്കൽ പിഴവുകൾ കാരണവും കോടതി റിപ്പോർട്ട് തിരുത്താനായി രണ്ടാഴ്ചത്തെ സമയപരിധി അനുവദിച്ച് മടക്കി.
കോടതി അനുവദിച്ച സമയപരിധി ഓഗസ്റ്റ് 3-ന് അവസാനിച്ചെങ്കിലും പിഴവുകൾ തീർത്ത് റിപ്പോർട്ട് വീണ്ടും സമർപ്പിച്ചത് ഓഗസ്റ്റ് 17-ന് മാത്രമാണ്. ഇതോടെ 60 ദിവസ കാലാവധി കഴിഞ്ഞെന്നും, അനുവദിച്ച സമയം പാലിക്കാൻ പ്രോസിക്യൂഷന് കഴിഞ്ഞില്ലെന്നും അതിനാൽ ബി.എൻ.എസ്.എസ് സെക്ഷൻ 187(2) പ്രകാരം തനിക്ക് നിയമപരമായ ജാമ്യം ലഭിക്കണമെന്നും പ്രതിഭാഗം അഭിഭാഷകൻ എം. ദേവേഷ് വാദിച്ചു.
സുപ്രീംകോടതി വിധികൾ ഉദ്ധരിച്ച് കോടതിയുടെ മറുപടി
ഈ വാദത്തെ തള്ളിക്കൊണ്ട്, അന്തിമ റിപ്പോർട്ടിലെ സാങ്കേതിക പിഴവുകൾ തിരുത്തി വീണ്ടും സമർപ്പിക്കുന്നത് ആദ്യ സമർപ്പണ തീയതിയുടെ (Original Filing Date) തുടർച്ചയായി മാത്രമേ കാണാനാകൂ എന്ന് ജസ്റ്റിസ് കാസർ എടപ്പഗത്ത് ചൂണ്ടിക്കാട്ടി.
ഇതിനായി മുൻകാല സുപ്രീം കോടതി വിധികളെ ഹൈക്കോടതി വിധിന്യായത്തിൽ ഉദ്ധരിച്ചു:
- ജഡ്ജ്ബീർ സിംഗ് v. എൻ.ഐ.എ (2023 17 SCC 48): അന്തിമ റിപ്പോർട്ട് നൽകിക്കഴിഞ്ഞാൽ അന്വേഷണം തീർന്നതായി കണക്കാക്കും; അതിനുശേഷം സ്വാഭാവിക ജാമ്യത്തിന് സ്ഥാനമില്ല.
- സി.ബി.ഐ v. കപിൽ വാധവാൻ (2024 3 SCC 734): പ്രോസിക്യൂഷൻ ആശ്രയിക്കുന്ന മുഴുവൻ രേഖകളും കുറ്റപത്രത്തോടൊപ്പം ഒരേസമയം ഹാജരാക്കിയില്ലെങ്കിലും കുറ്റപത്രം അസാധുവാകില്ല.
- നരേന്ദ്ര കുമാർ അമീൻ v. സി.ബി.ഐ (2015 3 SCC 417): പൂർണ്ണ രേഖകൾ നൽകിയില്ലെന്ന പേരിൽ ചാർജ്ഷീറ്റ് നിലനിൽക്കില്ലെന്ന വാദം തള്ളി.
- ശൗര്യ സുനിൽ കുമാർ സിംഗ് v. സി.ബി.ഐ (2026 KHC OnLine 6495): അധിക പകർപ്പുകൾ നൽകാത്തത് കാരണം പ്രതിക്ക് സ്വാഭാവിക ജാമ്യം നൽകാനാവില്ല.
ഈ സാഹചര്യത്തിൽ, അന്വേഷണം നിശ്ചിത കാലാവധിക്കുള്ളിൽ പൂർത്തിയായതിനാലും കേസിൽ കഴമ്പുണ്ടെന്ന് പ്രഥമദൃഷ്ട്യാ ബോധ്യപ്പെട്ടതിനാലും പ്രതി സമർപ്പിച്ച ജാമ്യാപേക്ഷ തള്ളുകയാണെന്ന് കോടതി പ്രസ്താവിച്ചു.
അഡ്വ. എം. ദേവേഷ്, എം. അനുരൂപ്, മുർഷിദ് അലി എം., ജ്യോതിസ് മേരി, എസ്.കെ. ശ്രീലക്ഷ്മി
ശ്രീ. തോമസ് സാബു വടക്കേക്കുറ്റ് (പബ്ലിക് പ്രോസിക്യൂട്ടർ)