ന്യൂഡൽഹി: രാജ്യത്തെ റോഡുകളിൽ ഇൻഷുറൻസ് ഇല്ലാതെ ഓടുന്ന ദശലക്ഷക്കണക്കിന് വാഹനങ്ങൾ ഉയർത്തുന്ന ഭീഷണിക്ക് തടയിടാൻ വിപ്ലവകരമായ നിർദ്ദേശങ്ങളുമായി സുപ്രീം കോടതി. മോട്ടോർ വാഹന നിയമപ്രകാരം മൂന്നാം കക്ഷി (Third Party) ഇൻഷുറൻസ് ഉറപ്പാക്കുന്നത് അപകടബാധിതർക്ക് വേഗത്തിൽ നഷ്ടപരിഹാരം ലഭ്യമാക്കാൻ അത്യാവശ്യമാണെന്ന് ജസ്റ്റിസുമാർ വ്യക്തമാക്കി.

വാഹന ഉടമകൾക്ക് വ്യക്തമായി മനസ്സിലാക്കാൻ സാധിക്കുന്ന വിധത്തിൽ നാല് തലങ്ങളുള്ള ഇൻഷുറൻസ് പോളിസി ഘടന കമ്പനികൾ നടപ്പിലാക്കണം. ആക്സിഡന്റ് ഇൻഫർമേഷൻ റിപ്പോർട്ടുകൾ തടസ്സമില്ലാതെ കൈമാറാൻ എല്ലാ സംസ്ഥാന പോലീസ് സേനകൾക്കും നിർദ്ദേശം നൽകി.

റോഡ് സുരക്ഷ എന്നത് ഭരണഘടനയുടെ ആർട്ടിക്കിൾ 21 നൽകുന്ന ജീവിക്കാനുള്ള അവകാശത്തിന്റെ അഭിഭാജ്യ ഘടകമാണ്. സാമ്പത്തിക പ്രയാസങ്ങൾ ചൂണ്ടിക്കാട്ടി റോഡ് സുരക്ഷാ നടപടികളിൽ നിന്നും ഭരണകൂടങ്ങൾക്ക് പിന്മാറാനാവില്ലെന്നും ആർട്ടിക്കിൾ 142 പ്രകാരമുള്ള പ്രത്യേക അധികാരം ഉപയോഗിച്ച് കോടതി വ്യക്തമാക്കി.