തിരുവനന്തപുരം ചെമ്പഴന്തി ശ്രീനാരായണ കോളേജിൽ ഹെഡ് അക്കൗണ്ടന്റായി സേവനമനുഷ്ഠിക്കവെ കോളേജ് ഫണ്ടിൽ നിന്ന് 1,47,626 രൂപ കൃത്രിമരേഖകൾ ചമച്ച് തിരിമറി നടത്തിയ കേസിലെ പ്രതി ഡി. രാജേന്ദ്രന്റെ അപ്പീൽ ഹൈക്കോടതി തള്ളി. തിരുവനന്തപുരം സ്പെഷ്യൽ കോടതി വിധിച്ച ഒരു വർഷത്തെ കഠിനതടവും 50,000 രൂപ പിഴയും ശരിവെച്ചുകൊണ്ട് ജസ്റ്റിസ് എ. ബദറുദ്ദീൻ ഉത്തരവിട്ടു.

1993 ഏപ്രിൽ 29 മുതൽ 1994 ജൂലൈ 30 വരെയുള്ള കാലയളവിലാണ് തട്ടിപ്പ് നടന്നത്. ക്യാഷ് ബുക്കുകൾ, ചെക്ക് ബുക്കുകൾ, ഫീസ് കളക്ഷൻ രസീതുകൾ എന്നിവയുടെ പൂർണ്ണ ചുമതലയുണ്ടായിരുന്ന രാജേന്ദ്രൻ, തന്റെ ഔദ്യോഗിക പദവി ദുരുപയോഗം ചെയ്ത് പല ഘട്ടങ്ങളിലായി തുക അപഹരിക്കുകയായിരുന്നു എന്ന് കോടതി കണ്ടെത്തി.

അഴിമതി നിരോധന നിയമത്തിലെ സെക്ഷൻ 13(2) r/w 13(1)(c) കൂടാതെ ഇന്ത്യൻ ശിക്ഷാ നിയമത്തിലെ 409, 465, 468, 471, 477A, 201 തുടങ്ങിയ വകുപ്പുകൾ പ്രകാരമാണ് പ്രതി കുറ്റക്കാരനാണെന്ന് കണ്ടെത്തിയത്.

പ്രതിക്ക് മുൻപ് നൽകിയിരുന്ന ജാമ്യ വ്യവസ്ഥകൾ റദ്ദാക്കിയ ഹൈക്കോടതി, ശിക്ഷ അനുഭവിക്കുന്നതിനായി വിചാരണക്കോടതിയായ തിരുവനന്തപുരം എൻക്വയറി കമ്മീഷണർ & സ്പെഷ്യൽ ജഡ്ജി മുൻപാകെ ഉടൻ കീഴടങ്ങാൻ നിർദ്ദേശിച്ചു. തടസ്സമുണ്ടായാൽ അറസ്റ്റ് വാറന്റ് പുറപ്പെടുവിച്ച് ശിക്ഷ നടപ്പാക്കാനും വിചാരണക്കോടതിയോട് ആവശ്യപ്പെട്ടു.