കൊച്ചി: കൊച്ചി മെട്രോ റെയിൽ പദ്ധതിയുടെ ബാനർജി റോഡ് വികസനത്തിനായി ഭൂമി ഏറ്റെടുത്ത ശേഷം നഷ്ടപരിഹാര തുക വിതരണം ചെയ്യുന്നതിൽ വരുത്തിയ കാലതാമസത്തിന് 9 ശതമാനം നിരക്കിൽ പലിശ നൽകണമെന്ന് കേരള ഹൈക്കോടതി വിധിച്ചു. സെന്റ് തെരേസാസ് കോൺവെന്റ് സമർപ്പിച്ച ഹർജി (W.P.(C) No. 14486/2014) അനുവദിച്ചുകൊണ്ടാണ് ജസ്റ്റിസ് സി. ജയചന്ദ്രന്റെ സുപ്രധാന ഉത്തരവ്.

നഷ്ടപരിഹാര തുക കൈപ്പറ്റുമ്പോൾ ഒപ്പുവെച്ച കരാറിലെ (Form 10(a)) വ്യവസ്ഥകൾ ചൂണ്ടിക്കാട്ടി പലിശ നിഷേധിച്ച എറണാകുളം ജില്ലാ കളക്ടറുടെ നടപടി ഹൈക്കോടതി പൂർണ്ണമായും തള്ളി. നിയമപ്രകാരം ലഭിക്കേണ്ട അർഹമായ അവകാശങ്ങളെ റൂളുകളോ കരാർ ഫോമുകളോ ഉപയോഗിച്ച് തടയാനാവില്ലെന്ന് കോടതി വ്യക്തമാക്കി.

കേസിന്റെ പശ്ചാത്തലം

കച്ചേരിപ്പടി മുതൽ മാധവ ഫാർമസി ജംഗ്ഷൻ വരെയുള്ള ബാനർജി റോഡ് വികസനത്തിനായാണ് സെന്റ് തെരേസാസ് കോൺവെന്റിന്റെ കൈവശമുണ്ടായിരുന്ന സ്ഥലം ഏറ്റെടുത്തത്. 2011 മേയ് 20-ന് സെക്ഷൻ 4(1) വിജ്ഞാപനവും 2012 ജൂലൈ 12-ന് സെക്ഷൻ 9 പ്രകാരമുള്ള നോട്ടീസും പുറപ്പെടുവിച്ചു. തുടർന്ന് 2012 നവംബർ 22-ന് കൈച്ചീട്ട് പ്രകാരം (Ext. P3 & P4) അധികൃതർ സ്ഥലം ഏറ്റെടുത്തു.

ജില്ലാതല പർച്ചേസ് കമ്മിറ്റി (DLPC) സെന്റിന് 52 ലക്ഷം രൂപ നിരക്കിൽ നഷ്ടപരിഹാരം നിശ്ചയിച്ചു. എന്നാൽ നിയമപ്രകാരം സ്ഥലം ഏറ്റെടുക്കുന്നതിന് മുൻപോ അതിനോടൊപ്പമോ നൽകേണ്ട 80% തുക, സ്ഥലം ഏറ്റെടുത്ത് 98 ദിവസങ്ങൾക്ക് ശേഷം (28/02/2013-ൽ) മാത്രമാണ് വിതരണം ചെയ്തത്. ബാക്കി 20% തുക വിതരണം ചെയ്തതാകട്ടെ 321 ദിവസങ്ങൾക്ക് ശേഷവും (09/10/2013-ൽ).

കളക്ടറുടെ വാദം തള്ളി ഹൈക്കോടതി

വൈകി ലഭിച്ച തുകയ്ക്ക് പലിശ ആവശ്യപ്പെട്ട് കോൺവെന്റ് അധികൃതർ നൽകിയ അപേക്ഷ ജില്ലാ കളക്ടർ നിർദാക്ഷിണ്യം തള്ളുകയായിരുന്നു (Ext. P7 ഉത്തരവ്). ലാൻഡ് അക്വിസിഷൻ റൂൾസിലെ ഫോം 10(എ) കരാറിലെ ക്ലോസ് (3) പ്രകാരം നിശ്ചയിച്ച തുകയിൽ കൂടുതൽ അവകാശപ്പെടാൻ ഉടമസ്ഥർക്ക് അർഹതയില്ലെന്നും, ഭരണപരമായ നടപടിക്രമങ്ങൾ കാരണമാണ് 20% തുക വൈകിയതെന്നുമായിരുന്നു കളക്ടറുടെ വാദം.

എന്നാൽ ഈ നിലപാടിനെ രൂക്ഷമായി വിമർശിച്ച ഹൈക്കോടതി, 1894-ലെ ഭൂമി ഏറ്റെടുക്കൽ നിയമത്തിലെ വകുപ്പ് 17(3A), വകുപ്പ് 34 എന്നിവ വ്യക്തമായ നിയമപരമായ സംരക്ഷണം പൗരന് നൽകുന്നുണ്ടെന്ന് ചൂണ്ടിക്കാട്ടി. റൂളുകളിലെ ഫോം ഒരു കരാർ മാത്രമാണെന്നും അത് നിയമത്തിലെ പ്രാഥമിക വ്യവസ്ഥകൾക്ക് മേലെ നിൽക്കില്ലെന്നും ജയകുമാരി പി. കേസ് (2026 KHC Online 75) ഉദ്ധരിച്ച് കോടതി വ്യക്തമാക്കി.

ഹർജിക്കാർക്കായി അഡ്വക്കേറ്റുമാരായ ടി.പി. സാജൻ, എം. മുഹമ്മദ് നവാസ്, പി. സന്തോഷ് കുമാർ എന്നിവരും മെട്രോയ്ക്ക് വേണ്ടി അഡ്വ. പി.എ. അഗസ്റ്റിൻ, റൂണി അഗസ്റ്റിൻ, മനോജ് കുഞ്ചാച്ചൻ എന്നിവരും ഗവൺമെന്റിന് വേണ്ടി സീനിയർ ഗവൺമെന്റ് പ്ലീഡറും ഹാജരായി.