കൊച്ചി: ബാർ കൗൺസിൽ മുൻ അംഗം ടി. എസ്. അജിത്തിനെ ഉൾപ്പെടുത്തി കേരളാ ബാർ കൗൺസിൽ താൽക്കാലിക ഭരണസമിതി പുന:സംഘടിപ്പിച്ച ബാർ കൗൺസിൽ ഓഫ് ഇന്ത്യയുടെ ഉത്തരവ് കേരളാ ഹൈക്കോടതി സ്റ്റേ ചെയ്തു.

അഭിഭാഷകരായ പ്രസാദ് ചന്ദ്രൻ, ബി. ഉണ്ണികൃഷ്ണകൈമൾ എന്നിവർ ഫയൽ ചെയ്ത ഹർജിയിലാണ് ജസ്റ്റിസ് ബെച്ചു കുര്യൻ തോമസിന്റെ നിർണ്ണായക ഉത്തരവ്.

സംസ്ഥാന ബാർ കൗൺസിലിലെ തെരഞ്ഞെടുക്കപ്പെട്ട അംഗങ്ങളെ വിജ്ഞാപനം ചെയ്യുന്ന ഗസറ്റ് വിജ്ഞാപനം പ്രസിദ്ധീകരിച്ചതിന് ശേഷം, നിലവിൽ കൗൺസിലിലേക്ക് തെരഞ്ഞെടുക്കപ്പെട്ട അംഗങ്ങളെ മാത്രമേ എൻറോൾമെന്റ് കമ്മിറ്റിയിലേക്കോ അല്ലെങ്കിൽ എൻറോൾമെന്റുമായി ബന്ധപ്പെട്ട നിയമപ്രകാരമുള്ള ചുമതലകൾ നിർവഹിക്കുന്ന മറ്റേതെങ്കിലും സമിതിയിലേക്കോ നിയമിക്കാൻ കഴിയൂ എന്ന് ഹർജിക്കാർ കോടതിയിൽ ചൂണ്ടിക്കാട്ടി.

മുൻ ബാർ കൗൺസിലിലെ അംഗമെന്ന നിലയിൽ ടി.എസ്. അജിത്തിന്റെ കാലാവധി ഇതിനകം അവസാനിച്ചിട്ടുള്ളതാണ്. അതിനാൽ അദ്ദേഹത്തെ കൗൺസിലിൽ പുനഃസംഘടിപ്പിച്ച് ഉൾപ്പെടുത്തുന്നത് 1961-ലെ അഭിഭാഷക നിയമത്തിലെ (Advocates Act 1961) 8, 10 വകുപ്പുകൾക്ക് തീർത്തും വിരുദ്ധമാണ് എന്നതായിരുന്നു ഹർജിക്കാരുടെ പ്രധാന വാദം.

ഹർജിക്കാരുടെ ഭാഗത്തുനിന്നുണ്ടായ വാദം പ്രഥമദൃഷ്ട്യാ നിലനിൽക്കുന്നതാണെന്ന് കോടതി വിലയിരുത്തി. തുടർന്നാണ് ബാർ കൗൺസിൽ ഓഫ് ഇന്ത്യയുടെ വിവാദ ഉത്തരവ് ഹൈക്കോടതി സ്റ്റേ ചെയ്തത്. ഹർജിക്കാർക്കു വേണ്ടി അഡ്വ. എം.ആർ. അനിസൻ കോടതിയിൽ ഹാജരായി.