ന്യൂഡൽഹി: വിവാഹജീവിതത്തിന് തുല്യമായി ഒരുമിച്ച് ജീവിക്കുന്ന ലിവ്-ഇൻ ബന്ധങ്ങളിൽ (Relationship in the nature of marriage) ഏർപ്പെട്ടിരിക്കുന്ന പുരുഷന്മാർക്കെതിരെയും ഭർത്താവിനോ ബന്ധുക്കൾക്കോ എതിരെ ചുമത്തുന്ന ഐ.പി.സി 498എ (ഇപ്പോഴത്തെ ഭാരതീയ ന്യായ സംഹിത വകുപ്പ് 85) പ്രകാരമുള്ള ഗാർഹിക പീഡന കുറ്റം നിലനിൽക്കുമെന്ന് സുപ്രീം കോടതി വിധി പ്രഖ്യാപിച്ചു.

ജസ്റ്റിസ് സഞ്ജയ് കരോൾ, ജസ്റ്റിസ് നോങ്മെയ്കാപം കോടീശ്വർ സിങ് എന്നിവരടങ്ങിയ ഡിവിഷൻ ബെഞ്ചാണ് കേസിൽ നിർണ്ണായക വിധി പുറപ്പെടുവിച്ചത് (Criminal Appeal No. 2026 / SLP (Crl.) No. 2240-2241 of 2026). കർണ്ണാടക സ്വദേശിയായ ഡോ. ലോകേഷ് ബി.എച്ച്. നൽകിയ ഹർജി തള്ളിക്കൊണ്ടാണ് സുപ്രീം കോടതിയുടെ ഈ ചരിത്രപ്രധാനമായ വിധിന്യായം.

കേസിന്റെ പശ്ചാത്തലം:
പരാതിക്കാരിയായ തീർത്ഥയും ഹർജിക്കാരനായ ഡോ. ലോകേഷും 2010 മുതൽ ബെംഗളൂരുവിൽ ഒന്നിച്ച് താമസിച്ച് വരികയായിരുന്നു. തങ്ങൾ ഹൈന്ദവ ആചാരപ്രകാരം വിവാഹിതരാണെന്ന് പരാതിക്കാരി അവകാശപ്പെട്ടപ്പോൾ, തങ്ങൾ തമ്മിൽ നിയമപരമായ വിവാഹം നടന്നിട്ടില്ലെന്നും കേവലം ലിവ്-ഇൻ ബന്ധം മാത്രമായിരുന്നുവെന്നും അതിനാൽ ഐ.പി.സി 498എ വകുപ്പ് തനിക്കെതിരെ നിലനിൽക്കില്ലെന്നും ഡോ. ലോകേഷ് വാദിച്ചു.

ഹർജിക്കാരൻ തന്റെ ആദ്യവിവാഹം മറച്ചുവെച്ചാണ് പരാതിക്കാരിക്കൊപ്പം ജീവിച്ചതെന്നും, തുടർന്ന് സ്ത്രീധനം ആവശ്യപ്പെട്ട് ക്രൂരമായ ശാരീരിക-മാനസിക പീഡനങ്ങൾ ഇരയാക്കിയെന്നും പരാതിയിൽ വ്യക്തമാക്കിയിരുന്നു. തുടർന്ന് കേസ് റദ്ദാക്കാൻ ഹർജിക്കാരൻ കർണാടക ഹൈക്കോടതിയെ സമീപിച്ചെങ്കിലും ഹൈക്കോടതി ഹർജി തള്ളി. ഈ ഉത്തരവ് സുപ്രീം കോടതിയും ശരിവെക്കുകയായിരുന്നു.

ഉദ്ദേശ്യപരമായ വ്യാഖ്യാനം (Purposive Interpretation):
ശിക്ഷാനിയമങ്ങൾ കർശനമായി വ്യാഖ്യാനിക്കണമെന്ന പൊതുതത്വം (Strict Interpretation of Penal Statutes) നിലനിൽക്കുമ്പോഴും, സമൂഹത്തിലെ തിന്മകൾ തടയാനും സ്ത്രീകൾക്ക് സംരക്ഷണം നൽകാനും കൊണ്ടുവന്ന വകുപ്പുകളിൽ ജനങ്ങളുടെ ആഗ്രഹങ്ങൾക്കും ഭരണഘടനാ മൂല്യങ്ങൾക്കും ചേർന്ന വ്യാഖ്യാനമാണ് നൽകേണ്ടതെന്ന് കോടതി ചൂണ്ടിക്കാട്ടി.

ഭരണഘടനയുടെ ആർട്ടിക്കിൾ 14 (സമത്വം), ആർട്ടിക്കിൾ 15(3) (സ്ത്രീകൾക്കുള്ള പ്രത്യേക പരിരക്ഷ), ആർട്ടിക്കിൾ 21 (വ്യക്തിസ്വാതന്ത്ര്യവും മാന്യമായി ജീവിക്കാനുള്ള അവകാശവും) എന്നിവ ഉയർത്തിപ്പിടിച്ചാണ് സുപ്രീം കോടതി ഈ തീരുമാനം കൈക്കൊണ്ടത്.