തിരുവനന്തപുരം: നീതിന്യായ രംഗത്ത് പിന്നാക്ക വിഭാഗങ്ങളുടെ മതിയായ പ്രാതിനിധ്യം ഉറപ്പാക്കുന്നതിനായി സംസ്ഥാന പിന്നാക്ക വിഭാഗ വികസന വകുപ്പ് ആവിഷ്‌കരിച്ചു നടപ്പാക്കുന്ന ‘അഭിഭാഷക ധനസഹായ പദ്ധതി 2026-27’ ലേക്ക് ഓൺലൈനായി അപേക്ഷ ക്ഷണിച്ചു. യോഗ്യരായ യുവ അഭിഭാഷകർക്ക് പ്രതിവർഷം 12,000/- രൂപ വീതം പരമാവധി മൂന്ന് വർഷത്തേക്ക് ആകെ 36,000/- രൂപ ധനസഹായം ലഭിക്കും.

സംസ്ഥാനത്തെ പിന്നാക്ക സമുദായങ്ങളുടെ (OBC) പട്ടികയിൽ ഉൾപ്പെട്ട നിയമ ബിരുദധാരികൾക്കാണ് അപേക്ഷിക്കാൻ അർഹതയുള്ളത്. അപേക്ഷകർ നിർബന്ധമായും കേരളീയനായിരിക്കണം. കുടുംബത്തിന്റെ വാർഷിക വരുമാനം 1,00,000/- (ഒരു ലക്ഷം) രൂപയിൽ കവിയരുത്.

ആവശ്യമായ സർട്ടിഫിക്കറ്റുകളും രേഖകളും

ഓൺലൈൻ അപേക്ഷയോടൊപ്പം താഴെ പറയുന്ന രേഖകളുടെ വ്യക്തമായ പകർപ്പുകൾ അപ്‌ലോഡ് ചെയ്യേണ്ടതാണ്:

1. ജാതി സർട്ടിഫിക്കറ്റ്: ബന്ധപ്പെട്ട വില്ലേജ് ഓഫീസറിൽ നിന്നുള്ള സർട്ടിഫിക്കറ്റ്.
2. വരുമാന സർട്ടിഫിക്കറ്റ്: ബന്ധപ്പെട്ട റവന്യൂ അധികാരിയിൽ നിന്ന് ഇ-ഡിസ്ട്രിക്റ്റ് (e-District) മുഖേന ഒരു വർഷത്തിനുള്ളിൽ ലഭിച്ചിട്ടുള്ള വരുമാന സർട്ടിഫിക്കറ്റിന്റെ നമ്പറും സെക്യൂരിറ്റി കോഡും.
3. എൻറോൾമെന്റ് സർട്ടിഫിക്കറ്റ്: കേരള ബാർ കൗൺസിൽ നൽകിയ എൻറോൾമെന്റ് രേഖ.
4. സീനിയർ അഭിഭാഷകന്റെ സാക്ഷ്യപത്രം: നിർശ്ശിത മാതൃകയിലുള്ള സാക്ഷ്യപത്രം (ഓൺലൈനിൽ ലഭ്യമായ ഫോർമാറ്റിൽ).
5. വിദ്യാഭ്യാസ യോഗ്യതാ സർട്ടിഫിക്കറ്റുകൾ: ഹയർ സെക്കണ്ടറി മുതലുള്ള യോഗ്യതാ സർട്ടിഫിക്കറ്റുകൾ.
6. ബാങ്ക് പാസ് ബുക്ക് പകർപ്പ്: അപേക്ഷകന്റെ/അപേക്ഷകയുടെ പേരിലുള്ള ലൈവ് ബാങ്ക് അക്കൗണ്ട് വിവരങ്ങൾ (ആധാർ കാർഡും അപ്‌ലോഡ് ചെയ്യണം).

ശ്രദ്ധിക്കുക: അപേക്ഷാ ഫാറത്തിന്റെ പ്രിന്റ് ഔട്ടോ അനുബന്ധ രേഖകളോ പിന്നാക്ക വിഭാഗ വികസന വകുപ്പിലേക്ക് നേരിട്ടോ തപാലിലോ അയക്കേണ്ടതില്ല. അപേക്ഷ സമർപ്പിക്കാനുള്ള അവസാന തീയതി 2026 ഓഗസ്റ്റ് 31 രാത്രി 12 മണി വരെയാണ്.