അമ്മയുടെ സത്യവാങ്മൂലം തള്ളി ഹൈക്കോടതി

കേസിൽ പ്രതിക്ക് ജാമ്യം അനുവദിക്കുന്നതിൽ എതിർപ്പില്ലെന്നും കേസ് ഒത്തുതീർപ്പായെന്നും കാണിച്ച് പെൺകുട്ടിയുടെ അമ്മ കോടതിയിൽ Annexure-3 ആയി സത്യവാങ്മൂലം സമർപ്പിച്ചിരുന്നു. ഭർത്താവിനെതിരെയുള്ള പരാതിയിൽ കൂടുതൽ മുന്നോട്ട് പോകാൻ ആഗ്രഹിക്കുന്നില്ലെന്നും പെൺകുട്ടിക്ക് പരാതിയില്ലെന്നും അമ്മ അവകാശപ്പെട്ടു.

എന്നാൽ ഈ നിലപാടിനെതിരെ കോടതി അതീവ ഗൗരവകരമായ നിരീക്ഷണങ്ങൾ നടത്തി. “സ്വന്തം മകളെ നിരന്തരം ലൈംഗികമായി ചൂഷണം ചെയ്ത കേസിൽ, പരാതിക്കാരിയായ അമ്മ കുട്ടിയുടെ സുരക്ഷിതത്വവും ക്ഷേമവും പൂർണ്ണമായും അവഗണിച്ച് ഒത്തുതീർപ്പിന് മുതിരുന്നത് ‘വേലി തന്നെ വിളവ് തിന്നുന്ന അവസ്ഥയ്ക്ക്’ തുല്യമാണ്” എന്ന് ജസ്റ്റിസ് കൗസർ എടപ്പഗത്ത് ചൂണ്ടിക്കാട്ടി.

സംഭവം നടന്നിട്ടില്ല എന്ന് അമ്മ കോടതിയിൽ വാദിച്ചിട്ടില്ലെന്നും, മറിച്ച് കേസ് ഒത്തുതീർപ്പാക്കി എന്ന് മാത്രമാണ് അവകാശപ്പെട്ടതെന്നും ബെഞ്ച് എടുത്തുപറഞ്ഞു. കുട്ടിക്കെതിരെ നടന്നിട്ടുള്ള ഇത്തരം മൃഗീയമായ കുറ്റകൃത്യങ്ങളിൽ മാതാപിതാക്കളുടെ ഇത്തരം ഒത്തുതീർപ്പുകൾ കുട്ടിയോടുള്ള അനീതിയാണെന്ന് കോടതി നിരീക്ഷിച്ചു.

“കുട്ടികൾക്കെതിരെയുള്ള ലൈംഗിക കുറ്റകൃത്യങ്ങൾ കോമ്പൗണ്ട് (ഒത്തുതീർപ്പ്) ചെയ്യാവുന്നവയല്ല. പ്രായപൂർത്തിയാകാത്ത കുട്ടികൾക്കെതിരെയുള്ള അതിക്രമ കേസുകളിൽ ക്രിമിനൽ നടപടികൾ അവസാനിപ്പിക്കാനോ, പ്രതിക്ക് ജാമ്യം നൽകാനോ മാതാപിതാക്കൾക്കോ രക്ഷിതാക്കൾക്കോ നിയമപരമായ അവകാശമില്ല” എന്ന് വിധിന്യായത്തിൽ വ്യക്തമാക്കി.

കുറ്റവാളികളെ നിയമത്തിന് മുന്നിൽ കൊണ്ടുവന്ന് ശിക്ഷ ഉറപ്പാക്കേണ്ടത് ഭരണകൂടത്തിന്റെ (State) കടമയാണ്. ആ കടമയെ മറികടക്കാൻ മാതാപിതാക്കൾ തമ്മിലുണ്ടാക്കുന്ന സ്വകാര്യ ഒത്തുതീർപ്പുകൾക്ക് കഴിയില്ല.

മാതാപിതാക്കൾ കുട്ടിയുടെ അവകാശങ്ങൾ സംരക്ഷിക്കുന്നതിൽ പരാജയപ്പെടുന്ന ഘട്ടങ്ങളിൽ, ‘പാരൻസ് പാട്രിയേ’ (Parens Patriae – പൗരന്മാരുടെയും കുട്ടികളുടെയും പരമോന്നത സംരക്ഷകൻ) എന്ന നിലയിൽ കോടതികൾക്ക് കുട്ടിക്ക് സംരക്ഷണം നൽകാൻ പൂർണ്ണമായ ബാധ്യതയുണ്ടെന്ന് വ്യക്തമാക്കിക്കൊണ്ട് കോടതി പ്രതിയുടെ ജാമ്യാപേക്ഷ തള്ളുകയായിരുന്നു.