കൊച്ചി: തൃശൂരിലെ സ്വകാര്യ സംരക്ഷണ കേന്ദ്രമായ ‘ആശ്രയ ഭവനിൽ’ കഴിയുന്ന വയോധിക നിയമവിരുദ്ധമായി കസ്റ്റഡിയിലല്ലെന്നും സ്വന്തം ഇഷ്ടപ്രകാരമാണ് അവിടെ തമസിക്കുന്നതെന്നും വ്യക്തമാക്കി ഹൈക്കോടതി ഡിവിഷൻ ബെഞ്ച്. എറണാകുളം എടവനക്കാട് സ്വദേശിയായ സുഭാഷ് കെ.ആർ. സമർപ്പിച്ച ഹേബിയസ് കോർപ്പസ് ഹർജി (W.P.(Crl.) No. 962/2026) തീർപ്പാക്കിക്കൊണ്ടാണ് ചീഫ് ജസ്റ്റിസ് സൗമൻ സെൻ, ജസ്റ്റിസ് ശ്യാം കുമാർ വി.എം. എന്നിവരടങ്ങിയ ബെഞ്ച് വിധികൽപ്പിച്ചത്.

കോടതിയുടെ നിർദ്ദേശപ്രകാരം നടന്ന ഓൺ‌ലൈൻ സംഭാഷണത്തിൽ താൻ യാതൊരുവിധ പീഡനത്തിനും ഇരയായിട്ടില്ലെന്നും സ്വന്തം താല്പര്യപ്രകാരമാണ് ആശ്രയ ഭവനത്തിൽ എത്തിയതെന്നും വയോധിക വ്യക്തമാക്കി. വീട്ടിൽ മറ്റുള്ളവർ ജോലിക്ക് പോകുമ്പോൾ ഉണ്ടാകുന്ന കടുത്ത ഒറ്റപ്പെടൽ ഒഴിവാക്കാനാണ് താൽക്കാലികമായി സ്ഥാപനത്തിലേക്ക് മാറിയതെന്ന് അവർ കോടതിയെ അറിയിച്ചു.

സ്വത്ത് തർക്കവും കുടുംബ പശ്ചാത്തലവും

താൻ താമസിക്കുന്ന വീടിന്റെ ഉടമസ്ഥാവകാശം തനിക്കാണെന്നും, ജീവിതാവസാനം വരെ താമസിക്കാനുള്ള അവകാശം നിലനിർത്തിക്കൊണ്ട് നാലാം എതിർകക്ഷിയായ വിമൽകുമാർ കെ.വി.യുടെ പേരിൽ വിൽപ്പത്രം എഴുതിവെച്ചിട്ടുണ്ടെന്നും വയോധിക വെളിപ്പെടുത്തി. പരസ്പര സൗകര്യപ്രദമായ അന്തരീക്ഷത്തിൽ സ്വന്തം വീട്ടിൽ പോയി താമസിക്കാനാണ് താൻ ആഗ്രഹിക്കുന്നതെന്നും അവർ ബെഞ്ചിനോട് വ്യക്തമാക്കി.

മുമ്പ് ഹർജിക്കാരനടക്കമുള്ള മറ്റ് ബന്ധുക്കളെ കാണുന്നതിന് സ്ഥാപനം തടസ്സം നിന്നതായി സൂചിപ്പിച്ചെങ്കിലും, പിന്നീട് ഒരിക്കൽ ഹർജിക്കാരൻ തന്നെ വന്നു കണ്ടതായി വയോധിക സമ്മതിച്ചു. തുടർന്ന് കോടതി സ്ഥാപന മാനേജരുമായി സംസാരിച്ചു.

ആശ്രയ ഭവൻ മാനേജരുടെ വിശദീകരണം

ബന്ധുക്കളെ കാണുന്നതിൽ നിന്ന് വയോധികയെ തടഞ്ഞിട്ടില്ലെന്ന് അഞ്ചാം എതിർകക്ഷിയായ ആശ്രയ ഭവൻ മാനേജർ കോടതിയെ ബോധിപ്പിച്ചു. വയോധികയെ കൂടെക്കൊണ്ടുപോകാൻ ഹർജിക്കാരൻ ആവശ്യപ്പെട്ടപ്പോൾ, സ്ഥാപനത്തിൽ പ്രവേശിപ്പിച്ച നാലാം എതിർകക്ഷിയുടെ സമ്മതമില്ലാതെ അയക്കാൻ കഴിയില്ലെന്ന് മാത്രമാണ് അറിയിച്ചതെന്ന് മാനേജർ വ്യക്തമാക്കി.

വയോധിക നിലവിൽ സുരക്ഷിതയാണെന്നും ഓഗസ്റ്റ് മാസത്തിലെ ഓണം ആഘോഷത്തോടനുബന്ധിച്ച് സ്വന്തം വീട്ടിലേക്ക് മടങ്ങാൻ തീരുമാനിച്ചിട്ടുണ്ടെന്നും ബോധ്യപ്പെട്ട സാഹചര്യത്തിൽ, ഹേബിയസ് കോർപ്പസ് ഹർജിയിൽ കൂടുതൽ നടപടികൾ ആവശ്യമില്ലെന്ന് വ്യക്തമാക്കി കോടതി കേസ് തീർപ്പാക്കി (Disposed of).