കേബിൾ ടിവി ഉപഭോക്താക്കൾക്കും പ്രാദേശിക കേബിൾ ഓപ്പറേറ്റർമാർക്കും (LCO) ആശ്വാസമേകുന്ന സുപ്രധാന വിധി പ്രസ്താവവുമായി സുപ്രീം കോടതി. കേബിൾ സിഗ്നലുകൾ പെട്ടെന്ന് വിച്ഛേദിക്കുന്നത് തടയുന്ന റഗുലേറ്ററി ചട്ടങ്ങൾ പാലിക്കാൻ മൾട്ടി-സിസ്റ്റം ഓപ്പറേറ്റർമാർക്ക് (MSO) നിർദ്ദേശം നൽകാനും, നിർദ്ദേശം ലംഘിച്ചാൽ കാരണം കാണിക്കൽ നോട്ടീസ് അയക്കാനും ടെലികോം റെഗുലേറ്ററി അതോറിറ്റി ഓഫ് ഇന്ത്യയ്ക്ക് (TRAI) പൂർണ്ണ അധികാരമുണ്ടെന്ന് രാജ്യത്തെ പരമോന്നത നീതിപീഠം വ്യക്തമാക്കി.

ട്രായിയുടെ ഈ അധികാരം തർക്കപരിഹാര ട്രിബ്യൂണലായ ടിഡിസാറ്റിന്റെ (TDSAT) അധികാരപരിധിയിലുള്ള കടന്നുകയറ്റമല്ലെന്ന് ജസ്റ്റിസ് എസ്.വി.എൻ. ഭട്ടി, ജസ്റ്റിസ് എൻ.വി. അഞ്ചാരിയ എന്നിവരടങ്ങിയ ഡിവിഷൻ ബെഞ്ച് ഉത്തരവിട്ടു. 2010 മാർച്ചിൽ ടിഡിസാറ്റ് പുറപ്പെടുവിച്ച ഉത്തരവിനെതിരെ ട്രായി നൽകിയ അപ്പീൽ (Civil Appeal No. 4359 of 2010) പൂർണ്ണമായും അനുവദിച്ചുകൊണ്ടാണ് സുപ്രീം കോടതി ഈ ചരിത്രപ്രധാന വിധി പ്രഖ്യാപിച്ചത്.

കേസിന് ആസ്പദമായ സംഭവം

തമിഴ്‌നാട്ടിലെ സേലം ആസ്ഥാനമായി പ്രവർത്തിക്കുന്ന മൾട്ടി-സിസ്റ്റം ഓപ്പറേറ്ററായ എം/എസ് പോളിമർ കേബിൾ നെറ്റ്‌വർക്ക് (Polimer Cable Network), തങ്ങളുമായി കരാറുള്ള പ്രാദേശിക കേബിൾ ഓപ്പറേറ്റർമാർക്ക് നൽകിയിരുന്ന കേബിൾ ടിവി സിഗ്നലുകൾ മുൻകൂട്ടി അറിയിപ്പില്ലാതെ പെട്ടെന്ന് വിച്ഛേദിച്ചു. ഇതിനെതിരെ എൽ.സി.ഒമാർ ട്രായിയെയും മദ്രാസ് ഹൈക്കോടതിയെയും സമീപിച്ചു.

മദ്രാസ് ഹൈക്കോടതിയുടെ നിർദ്ദേശാനുസരണം അന്വേഷണം നടത്തിയ ട്രായി, 2004-ലെ ഇന്റർകണക്ട് റെഗുലേഷനുകളിലെ (IC Regulations 4.1 & 4.3) വ്യവസ്ഥകൾ പോളിമർ കേബിൾ നെറ്റ്‌വർക്ക് ലംഘിച്ചതായി കണ്ടെത്തി. മൂന്ന് ആഴ്ചത്തെ മുൻകൂർ നോട്ടീസ് നൽകണമെന്നും ഉപഭോക്താക്കളെ പത്രപ്പരസ്യം വഴി അറിയിക്കണമെന്നുമുള്ള ചട്ടങ്ങൾ ലംഘിച്ചതിന് സിഗ്നലുകൾ പുനഃസ്ഥാപിക്കാൻ ട്രായി നിർദ്ദേശിച്ചു (Direction dated 21.10.2008).

ട്രായിയുടെ ഉത്തരവ് പൂർണ്ണമായും നടപ്പാക്കാത്തതിനെ തുടർന്ന് സേലം പോലീസ് കമ്മീഷണറുടെ സഹായത്തോടെ ട്രായി അന്വേഷണം നടത്തുകയും കേബിൾ വിച്ഛേദിക്കൽ തുടരുകയാണെന്ന് കണ്ടെത്തുകയും ചെയ്തു. ഇതിനെത്തുടർന്ന് വിചാരണ കോടതിയിൽ ക്രിമിനൽ പരാതി നൽകുന്നതിന് മുൻപടിയായി ട്രായി പോളിമർ നെറ്റ്‌വർക്കിന് കാരണം കാണിക്കൽ നോട്ടീസ് (Show Cause Notice dated 19.02.2009) അയച്ചു.

ടിഡിസാറ്റിന്റെ തെറ്റായ നിലപാടും സുപ്രീം കോടതിയുടെ തിരുത്തും

ട്രായിയുടെ കാരണം കാണിക്കൽ നോട്ടീസിനെതിരെ പോളിമർ കേബിൾ നെറ്റ്‌വർക്ക് ടിഡിസാറ്റിനെ സമീപിച്ചു. സർവീസ് പ്രൊവൈഡർമാർ തമ്മിലുള്ള തർക്കങ്ങൾ പരിഹരിക്കാൻ ട്രായിക്ക് അധികാരമില്ലെന്നും, കരാർ ലംഘനങ്ങൾക്ക് സിവിൽ-ക്രിമിനൽ നടപടികൾ ഒരുമിച്ച് എടുക്കാൻ കഴിയില്ലെന്നും ചൂണ്ടിക്കാട്ടി ട്രായിയുടെ നോട്ടീസ് ടിഡിസാറ്റ് റദ്ദാക്കുകയുണ്ടായി.

എന്നാൽ ഈ നിലപാട് പൂർണ്ണമായും തെറ്റാണെന്ന് സുപ്രീം കോടതി നിരീക്ഷിച്ചു. ട്രായി ഇവിടെ ഇരു കൂട്ടരും തമ്മിലുള്ള കരാർ തർക്കം തീർപ്പാക്കുകയല്ല (Adjudication) ചെയ്തത്, മറിച്ച് ട്രായി ഉണ്ടാക്കിയ ചട്ടങ്ങൾ (Interconnect Regulations) പാലിക്കുന്നുണ്ടെന്ന് ഉറപ്പുവരുത്തുക മാത്രമാണ് ചെയ്തത്.

നിയമം കയ്യിലെടുക്കാനും, ചട്ടങ്ങൾ കാറ്റിൽപ്പറത്തി ഉപഭോക്താക്കളുടെ സേവനം തടസ്സപ്പെടുത്താനും ഒരു സേവനദാതാവിനെയും അനുവദിക്കാനാവില്ലെന്നും സുപ്രീം കോടതി വ്യക്തമാക്കി.