ന്യൂഡൽഹി: കേന്ദ്ര സർക്കാരിന്റെ ദേശീയ വിദ്യാഭ്യാസ നയം (NEP 2020) അനുസരിച്ച് സ്കൂൾ വിദ്യാർത്ഥികൾക്കായി നടപ്പിലാക്കുന്ന ‘അപാർ’ (Automated Permanent Academic Account Registry – APAAR) ഐഡി നിർബന്ധമാക്കാനാകില്ലെന്ന് സുപ്രീം കോടതി വ്യക്തമായി ഉത്തരവിട്ടു. അപാർ രജിസ്ട്രേഷനായി കുട്ടികളുടെ ആധാർ വിവരങ്ങൾ നൽകാൻ താല്പര്യമില്ലാത്ത മാതാപിതാക്കൾക്ക് അത് നിരസിക്കാനുള്ള (Refuse/Withhold Consent) വ്യക്തമായ ഓപ്ഷൻ സമ്മതപത്രത്തിൽ ഉൾപ്പെടുത്തണമെന്ന് ചീഫ് ജസ്റ്റിസ്, ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ ബെഞ്ച് ഉത്തരവിട്ടു.

കേന്ദ്ര ബോർഡായ സി.ബി.എസ്.ഇ (CBSE) സ്കൂളുകളിൽ പഠിക്കുന്ന കുട്ടികളുടെ മാതാപിതാക്കളായ അഭിഷേക് ബക്ഷി ഉൾപ്പെടെയുള്ളവർ സമർപ്പിച്ച റിട്ട് ഹർജിയിലാണ് (Writ Petition (Civil) No. 832/2026) പരമോന്നത കോടതിയുടെ ഉത്തരവ്. ഹർജിക്കാർക്ക് വേണ്ടി മുതിർന്ന അഭിഭാഷക ഇന്ദിരാ ജയ്സിംഗ്, അഭിഭാഷക മിഷി ചൗധരി തുടങ്ങിയവർ ഹാജരായി.

ഒറീസ ഹൈക്കോടതി വിധി രാജ്യവ്യാപകമാക്കി

സമാന വിഷയത്തിൽ ഒറീസ ഹൈക്കോടതി രോഹിത് ആനന്ദ് ദാസ് എതിർ സ്റ്റേറ്റ് ഓഫ് ഒഡീഷ കേസിലെടുത്ത നിലപാട് രാജ്യവ്യാപകമായി നടപ്പിലാക്കാൻ സുപ്രീം കോടതി നിർദ്ദേശിച്ചു. അപാർ രജിസ്ട്രേഷനായി തയാറാക്കിയിട്ടുള്ള മാതൃകാ സമ്മതപത്രത്തിൽ (Model Consent Form), മാതാപിതാക്കൾക്ക് സമ്മതം നൽകാനും നിരസിക്കാനും വ്യക്തമായ തെരഞ്ഞെടുപ്പ് നൽകണമെന്ന് കോടതി പറഞ്ഞു. അത്തരമൊരു മുൻകരുതൽ ഉണ്ടെങ്കിൽ മാത്രമേ ‘അർത്ഥവത്തായ സമ്മതം’ സാധ്യമാകൂ എന്ന് കോടതി നിരീക്ഷിച്ചു.

ഡി.പി.ഡി.പി നിയമം (DPDP Act 2023) പാലിക്കണം

സമ്മതം നൽകി അപാറിൽ ചേരുന്ന വിദ്യാർത്ഥികളുടെ വിവരങ്ങൾ ദുരുപയോഗം ചെയ്യപ്പെടുമെന്ന ആശങ്കകൾക്കും കോടതി മറുപടി നൽകി. ഒരു ഭരണനിർവഹണ സ്കീം വഴിയാണ് ഡാറ്റ ശേഖരിക്കുന്നത് എന്നതുകൊണ്ട് അധികൃതർക്ക് ഡാറ്റാ സംരക്ഷ ഉത്തരവാദിത്തങ്ങളിൽ നിന്ന് ഒഴിഞ്ഞുമാറാനാകില്ല. എല്ലാത്തരം ഡാറ്റ ശേഖരണവും Digital Personal Data Protection Act, 2023 (DPDP Act) അനുസരിച്ച് മാത്രമായിരിക്കണം.

ശേഖരിക്കുന്ന വിവരങ്ങൾ യാതൊരു കാരണവശാലും സ്വകാര്യ ഏജൻസികൾക്കോ മൂന്നാം കക്ഷികൾക്കോ പങ്കുവെക്കാനോ കൈമാറാനോ പാടില്ലെന്നും കോടതി കർശനമായി വ്യക്തമാക്കി.