ആദ്യ വിവാഹം നിലനിൽക്കെ നടക്കുന്ന രണ്ടാം വിവാഹം നിയമപരമായി അസാധുവാണെങ്കിലും, ആ ബന്ധത്തിൽ ജനിക്കുന്ന മക്കൾ നിയമപരമായ മക്കളായി കണക്കാക്കപ്പെടുമെന്നും അവർക്ക് പിതാവിന്റെ സ്വത്തിലും പെൻഷൻ ആനുകൂല്യങ്ങളിലും തുല്യ അവകാശമുണ്ടെന്നും കേരള ഹൈക്കോടതി വ്യക്തമാക്കി. കെ.എസ്.ആർ.ടി.സിയിൽ വെഹിക്കിൾ സൂപ്പർവൈസറായി ജോലി ചെയ്തിരുന്ന അന്തരിച്ച സി. വേലായുധന്റെ കേസ് പരിഗണിച്ചാണ് ജസ്റ്റിസ് ശോഭ അന്നമ്മ ഈപ്പൻ ഈ സുപ്രധാന ഉത്തരവ് പുറപ്പെടുവിച്ചത്.

2015 മെയ് 7-നാണ് വേലായുധൻ ഡ്യൂട്ടിക്കിടെ അന്തരിച്ചത്. തുടർന്ന് അദ്ദേഹത്തിന്റെ ആദ്യ ഭാര്യ വസന്തയും മകൻ ദിവേഷും സർവീസ് ആനുകൂല്യങ്ങൾക്കും അനുകമ്പാ നിയമനത്തിനുമായി കോർപ്പറേഷനെ സമീപിച്ചിരുന്നു. എന്നാൽ മറ്റൊരു സ്ത്രീയായ ലക്ഷ്മിയും താനാണ് യഥാർത്ഥ ഭാര്യയെന്ന് അവകാശപ്പെട്ട് രംഗത്തെത്തുകയും തർക്കങ്ങൾ ഉടലെടുക്കുകയും ചെയ്തതോടെ KSRTC അധികൃതർ ആനുകൂല്യങ്ങൾ തടഞ്ഞുവെച്ചു. തുടർന്ന് നിയമപരമായ അനന്തരാവകാശ സർട്ടിഫിക്കറ്റ് ഹാജരാക്കാൻ കോർപ്പറേഷൻ നിർദ്ദേശിക്കുകയായിരുന്നു.

ഹിന്ദു വിവാഹ നിയമത്തിലെ സെക്ഷൻ 16 പ്രകാരം അസാധുവായ വിവാഹങ്ങളിൽ ജനിക്കുന്ന കുട്ടികളുടെ നിയമപരമായ പദവി കോടതി വ്യക്തമാക്കുകയുണ്ടായി. സുപ്രീംകോടതിയുടെ ‘രമേശ്വരി ദേവി v. ബിഹാർ സർക്കാരുമായി’ ബന്ധപ്പെട്ട മുൻവിധികളുടെ അടിസ്ഥാനത്തിലാണ് കോടതിയുടെ ഈ നിരീക്ഷണം.

കോടതിയുടെ പ്രധാന ഉത്തരവുകൾ:

• തഹസിൽദാർ നൽകിയ ഔദ്യോഗിക നിയമപരമായ അവകാശ സർട്ടിഫിക്കറ്റിൽ (Ext.R6(q)) ഉൾപ്പെടുത്തിയിട്ടുള്ള എല്ലാ അവകാശികൾക്കും ഗ്രാറ്റുവിറ്റി ഉൾപ്പെടെയുള്ള റിട്ടയർമെന്റ് ആനുകൂല്യങ്ങളും കുടുംബ പെൻഷനും നിയമപ്രകാരം വിതരണം ചെയ്യണം.
• രണ്ടാം ഭാര്യയായ ലക്ഷ്മിക്ക് റിട്ടയർമെന്റ് ആനുകൂല്യങ്ങൾക്കോ കുടുംബ പെൻഷനോ അർഹതയില്ലെങ്കിലും, ആ ബന്ധത്തിൽ ജനിച്ച കുട്ടികൾക്ക് പ്രായപൂർത്തിയാകുന്നത് വരെ ആനുകൂല്യങ്ങളിൽ അവകാശമുണ്ട്.
• രണ്ടാം ഹർജിക്കാരനായ മകന്റെ അനുകമ്പാ നിയമനത്തിനുള്ള അപേക്ഷ മൂന്ന് മാസത്തിനകം കെ.എസ്.ആർ.ടി.സി അധികാരികൾ പരിഗണിക്കണം.

ഈ ഉത്തരവിലൂടെ ദീർഘകാലമായി നിലനിന്നിരുന്ന തർക്കങ്ങൾക്കാണ് ഹൈക്കോടതി വിരാമമിട്ടിരിക്കുന്നത്. അനുകമ്പാ നിയമനത്തിന് ഒന്നാം ഹർജിക്കാരന്റെ മകൻ തയ്യാറല്ലെങ്കിൽ, എതിർകക്ഷിയുടെ മക്കൾക്കും നിയമപ്രകാരം അപേക്ഷിക്കാൻ അർഹതയുണ്ടെന്നും കോടതി വ്യക്തമാക്കിയിട്ടുണ്ട്.