ന്യൂഡൽഹി: മേഘാലയയിലെ ചിറാപുഞ്ചിയിൽ ഭർത്താവിനൊപ്പം ഹണിമൂൺ ആഘോഷിക്കാനെത്തിയ വേളയിൽ, കാമുകന്റെയും വാടകക്കൊലയാളികളുടെയും സഹായത്തോടെ ഭർത്താവിനെ കൊലപ്പെടുത്തി കൊക്കയിലേക്ക് തള്ളിയ കേസിൽ പ്രതി സോനം രഘുവംശി എന്ന ബിറ്റിക്ക് ലഭിച്ച ജാമ്യം സുപ്രീം കോടതി റദ്ദാക്കി (ക്രിമിനൽ അപ്പീൽ നമ്പർ: 2026 ലെ SLP (Crl) No. 11944). മേഘാലയ ഹൈക്കോടതിയും വിചാരണക്കോടതിയും നൽകിയ ജാമ ഉത്തരവ് റദ്ദാക്കിക്കൊണ്ട്, മൂന്നാഴ്ചയ്ക്കകം വിചാരണക്കോടതിയിൽ കീഴടങ്ങാൻ ജസ്റ്റിസ് എം.എം. സുന്ദരേഷ്, ജസ്റ്റിസ് പ്രസന്ന ബി. വരാലെ എന്നിവരടങ്ങിയ ബെഞ്ച് നിർദ്ദേശിച്ചു.

2025 മേയ് മാസത്തിലാണ് കേസിനാസ്പദമായ സംഭവം നടന്നത്. വിവാഹശേഷം ഭർത്താവിനോടൊപ്പം മേഘാലയ സന്ദർശനത്തിനെത്തിയ സോനം രഘുവംശി, കാമുകനും മറ്റു മൂന്ന് സഹായികൾക്കുമൊപ്പം ചേർന്ന് ഭർത്താവിനെ കൊലപ്പെടുത്തുകയായിരുന്നുവെന്നാണ് പ്രോസിക്യൂഷൻ കേസ്. ജൂൺ 2-ന് ആഴമേറിയ മലയിടുക്കിൽ നിന്ന് മൃതദേഹം കണ്ടെടുത്തു. ഭാരതീയ ന്യായ സംഹിത (BNS) വകുപ്പുകൾ 103(1), 238(a), 309(6), 3(6) എന്നിവ പ്രകാരം സോഹ്റ പോലീസാണ് എഫ്.ഐ.ആർ (No. 7/2025) രജിസ്റ്റർ ചെയ്തത്. തുടർന്ന് ഉത്തർപ്രദേശിലെ ഗാസിപ്പൂരിൽ വച്ച് പ്രതിയെ അറസ്റ്റ് ചെയ്യുകയായിരുന്നു.

മുൻപ് വിചാരണക്കോടതിയിൽ സമർപ്പിച്ച മൂന്ന് ജാമ്യാപേക്ഷകളും വസ്തുതകളുടെ അടിസ്ഥാനത്തിൽ തള്ളപ്പെട്ടിരുന്നു. എന്നാൽ, അറസ്റ്റ് രേഖപ്പെടുത്തുമ്പോൾ അറസ്റ്റ് വിവരങ്ങൾ (Grounds of Arrest) പൂർണ്ണമായി നൽകിയില്ലെന്നും നൽകിയ നോട്ടീസിൽ ബി.എൻ.എസ് വകുപ്പ് 103(1)-ന് പകരം 403(1) എന്ന് തെറ്റായി അച്ചടിച്ചുവെന്നുമുള്ള സാങ്കേതികത്വം ഉന്നയിച്ചാണ് നാലാമത്തെ ജാമ്യാപേക്ഷ സമർപ്പിച്ചത്. ഈ വാദം അംഗീകരിച്ചാണ് വിചാരണക്കോടതിയും ഹൈക്കോടതിയും പ്രതിക്ക് ജാമ്യം അനുവദിച്ചിരുന്നത്.

എന്നാൽ, സംസ്ഥാന സർക്കാരിന് വേണ്ടി ഹാജരായ സോളിസിറ്റർ ജനറൽ തുഷാർ മേത്ത സുപ്രീം കോടതിയിൽ ശക്തമായ എതിർപ്പുന്നയിച്ചു. പ്രതിക്ക് എല്ലാ വിവരങ്ങളും നൽകിയിട്ടുണ്ടെന്നും മജിസ്ട്രേറ്റിന് മുന്നിൽ ഹാജരാക്കിയപ്പോൾ പ്രതി തനിക്ക് അറസ്റ്റ് കാരണങ്ങൾ അറിയാമെന്ന് വ്യക്തമാക്കിയതാണെന്നും അദ്ദേഹം ചൂണ്ടിക്കാട്ടി. ‘മിഹിർ രാജേഷ് ഷാ v. സ്റ്റേറ്റ് ഓഫ് മഹാരാഷ്ട്ര’ കേസിലെ വിധി ഭാവിയിലുള്ള കേസുകൾക്ക് (Prospective) മാത്രമാണ് ബാധകമെന്നും മുൻകാല അറസ്റ്റുകൾക്ക് ഇത് ബാധകമല്ലെന്നും കോടതി വ്യക്തമാക്കി.