ന്യൂഡൽഹി, ജൂലൈ 15: ഒസ്യത്ത് (ഉയിൽപത്രം) നിർവ്വഹിക്കുന്നതുമായി ബന്ധപ്പെട്ട കേസിൽ തൃശൂർ പ്രിൻസിപ്പൽ സബ് കോടതിയിലെ ജഡ്ജിക്കെതിരെ കടുത്ത പരാമർശങ്ങൾ നടത്തിക്കൊണ്ട് അദ്ദേഹത്തെ ജുഡീഷ്യൽ അക്കാദമിയിൽ പരിശീലനത്തിന് അയക്കാൻ നിർദ്ദേശിച്ച കേരള ഹൈക്കോടതിയുടെ വിധി സുപ്രീം കോടതി റദ്ദാക്കി. ഹൈക്കോടതി പുറപ്പെടുവിച്ച മൂന്നര പേജ് മാത്രമുള്ള സംക്ഷിപ്ത വിധി നീതിന്യായ വ്യവസ്ഥയുടെ അന്തസ്സിന് ചേർന്നതല്ലെന്ന് ജസ്റ്റിസ് സഞ്ജയ് കരോൾ, ജസ്റ്റിസ് വിപുൽ എം. പാഞ്ചോലി എന്നിവരടങ്ങിയ ബെഞ്ച് വിധിച്ചു.

തങ്കത്തിന്റെ ഒസ്യത്തും തൃശൂർ കോടതിയുടെ നിരീക്ഷണവും

കേസിന് ആസ്പദമായ സംഭവം തൃശൂർ ഒല്ലൂക്കര സ്വദേശിനിയായ തങ്കത്തിന്റെ സ്വത്തുവിഹിതവുമായി ബന്ധപ്പെട്ടതാണ്. തങ്കം 2011 ഓഗസ്റ്റ് 27-ന് ഒരു വാഹനാപകടത്തിൽ മരണപ്പെട്ടു. തങ്കത്തിന്റെ മരണശേഷം മകൾ ലക്ഷ്മി തൃശൂർ പ്രിൻസിപ്പൽ സബ് കോടതിയിൽ (O.S. 156 of 2015) സ്വത്തുക്കൾ ഭാഗം വെയ്ക്കണം എന്ന് ആവശ്യപ്പെട്ട് കേസ് ഫയൽ ചെയ്തു.

എന്നാൽ തങ്കം തങ്ങളുടെ പേരിൽ 1999 മാർച്ചിൽ ഒരു രജിസ്റ്റർ ചെയ്ത ഒസ്യത്ത് (Will No. 35/1999) എഴുതി വെച്ചിട്ടുണ്ടെന്നും ആയതിനാൽ തങ്ങൾക്കാണ് അവകാശമെന്നും മറ്റു മക്കളായ പ്രതികൾ വാദിച്ചു. എന്നാൽ, എഴുത്തും വായനയുമറിയാത്ത തങ്കത്തെ ഒസ്യത്തിന്റെ ഉള്ളടക്കം വായിച്ചു കേൾപ്പിച്ചിട്ടുണ്ടോ എന്ന കാര്യത്തിൽ തെളിവില്ലെന്നും, നിയമപരമായ സാക്ഷികളെ വിസ്തരിക്കുന്നതിൽ ഗുരുതര വീഴ്ച പറ്റിയിട്ടുണ്ടെന്നും കണ്ടെത്തിയ തൃശൂർ സബ് ജഡ്ജി ഒസ്യത്ത് നിയമവിരുദ്ധമാണെന്ന് വിധി എഴുതി. വസ്തു പത്ത് വിഹിതങ്ങളാക്കി ഭാഗിച്ച് പരാതിക്കാരിയായ ലക്ഷ്മിക്ക് 2/10 ഭാഗം അനുവദിച്ചുകൊണ്ട് പ്രാഥമിക വിധി പുറപ്പെടുവിച്ചു.

കേരള ഹൈക്കോടതിയുടെ വിവാദപരമായ തിരുത്തൽ നടപടി

തൃശൂർ സബ് കോടതിയുടെ വിധിക്കെതിരെ പ്രതികൾ കേരള ഹൈക്കോടതിയെ സമീപിക്കുകയുണ്ടായി (RFA No. 298 of 2019). അപ്പീൽ പരിഗണിച്ച സിംഗിൾ ബെഞ്ച്, സബ് ജഡ്ജിക്ക് കേസിന്റെ മർമ്മം മനസ്സിലായില്ലെന്നും അനാവശ്യ കാര്യങ്ങളാണ് വിധിന്യായം തള്ളിക്കളയാൻ കാരണമായി സ്വീകരിച്ചതെന്നും കുറ്റപ്പെടുത്തി. വെറും രണ്ട് ഖണ്ഡികകളിൽ എഴുതിത്തീർത്ത വിധിന്യായത്തിൽ, സബ് ജഡ്ജിയെ ‘നിർബന്ധിത പരിശീലനത്തിനായി’ കേരള ജുഡീഷ്യൽ അക്കാദമിയിലേക്ക് അയക്കാൻ അക്കാദമി ഡയറക്ടർക്ക് നിർദ്ദേശം നൽകുകയുമുണ്ടായി.

“ജുഡീഷ്യൽ ഓഫീസർമാരെ വഴിനടത്തേണ്ടത് അവഹേളനത്തിലൂടെയോ ശാസനയിലൂടെയോ ആകരുത്. മറിച്ച് അവരുടെ പ്രവർത്തനങ്ങളിൽ സഹാനുഭൂതിയും മാർഗ്ഗനിർദ്ദേശവും നൽകുന്ന ഒരു സുഹൃത്തായിരിക്കണം അപ്പീൽ കോടതികൾ.” – ജസ്റ്റിസ് സഞ്ജയ് കരോൾ

സുപ്രീം കോടതിയുടെ ചരിത്രപരമായ തിരുത്ത്

ഹൈക്കോടതി വിധിക്കെതിരെ ലക്ഷ്മി നൽകിയ അപ്പീൽ അനുവദിച്ചുകൊണ്ട് സുപ്രീം കോടതി ഇപ്പോൾ വ്യക്തമാക്കുന്നത് ഒന്നാം അപ്പീൽ കോടതി വസ്തുതകളും നിയമങ്ങളും സൂക്ഷ്മമായി പരിശോധിക്കാൻ കടപ്പെട്ടിരിക്കുന്നു എന്നാണ്. പ്രത്യേകിച്ച് കീഴ്‌ക്കോടതിയുടെ വിധി റദ്ദാക്കുമ്പോൾ അതിനുള്ള തക്കതായ കാരണങ്ങൾ ചൂണ്ടിക്കാണിക്കേണ്ടതുണ്ട്.

ഹൈക്കോടതിയുടെ വിധി അങ്ങേയറ്റം ദൗർഭാഗ്യകരവും കീഴ്‌ക്കോടതി ജഡ്ജിമാരുടെ ആത്മവിശ്വാസവും നിർഭയത്വവും നശിപ്പിക്കുന്നതുമാണ്. സിംഗിൾ ബെഞ്ചിന്റെ പരമാർശങ്ങളെല്ലാം പൂർണ്ണമായി തള്ളിക്കളഞ്ഞ സുപ്രീം കോടതി, തൃശൂർ സബ് കോടതി വിധിക്കെതിരായ അപ്പീൽ വീണ്ടും ആദ്യം മുതൽ വിശദമായി വാദം കേട്ട് തീർപ്പാക്കാനായി കേരള ഹൈക്കോടതിയിലേക്ക് തന്നെ മടക്കി അയച്ചു.