എറണാകുളം: എംപ്ലോയീസ് പ്രൊവൈഡന്റ് ഫണ്ട് ആന്റ് മിസലേനിയസ് പ്രൊവിഷൻസ് ആക്ട് 1952 (EPF Act) അനുസരിച്ച് റീജിയണൽ പ്രൊവൈഡന്റ് ഫണ്ട് കമ്മീഷണർ ചുമത്തുന്ന ഡാമേജസ് പിഴശിക്ഷയ്ക്കെതിരെ (Section 14-B) നൽകുന്ന അപ്പീലുകൾ ഫയലിൽ സ്വീകരിക്കുന്നതിന് (Admission) നിർണ്ണയിക്കപ്പെട്ട തുകയുടെ നിശ്ചിത ശതമാനം ട്രൈബ്യൂണലിൽ മുൻകൂറായി കെട്ടിവെക്കണമെന്ന് (Pre-deposit) നിർബന്ധിക്കാനാവില്ലെന്ന് കേരള ഹൈക്കോടതി വ്യക്താക്കി.

അപ്പീൽ അഡ്മിറ്റ് ചെയ്യാൻ തുകയുടെ 10 ശതമാനവും 20 ശതമാനവും കെട്ടിവെക്കാൻ സെൻട്രൽ ഗവൺമെന്റ് ഇൻഡസ്ട്രിയൽ ട്രൈബ്യൂണൽ-കം-ലേബർ കോർട്ട് (CGIT) പുറപ്പെടുവിച്ച ഉത്തരവുകൾ ചോദ്യം ചെയ്തുകൊണ്ട് കേരള ആയുർവേദ ലിമിറ്റഡ്, കേരള പേപ്പർ പ്രൊഡക്ട്സ് ലിമിറ്റഡ്, കെ.ഇ.എൽ ഇലക്ട്രിക്കൽ മെഷീൻസ് ലിമിറ്റഡ് എന്നിവർ നൽകിയ ഒൻപത് റിട്ട് ഹർജികൾ അനുവദിച്ചുകൊണ്ടാണ് ജസ്റ്റിസ് എം.എ. അബ്ദുൽ ഹക്കീം ഈ ചരിത്രപരമായ ഉത്തരവ് പുറപ്പെടുവിച്ചത്.

നിയമപരമായ വൈരുദ്ധ്യവും കോടതിയുടെ നിരീക്ഷണവും

ഇ.പി.എഫ് നിയമത്തിലെ സെക്ഷൻ 7-O പരിശോധിച്ചാൽ, ഒരു തൊഴിലുടമയിൽ നിന്ന് ഈടാക്കേണ്ട ‘കുടിശ്ശിക തുക’ (Amount due) നിർണ്ണയിക്കുന്ന സെക്ഷൻ 7-A ഉത്തരവുകൾക്കെതിരെയുള്ള അപ്പീലുകൾക്കാണ് മുൻകൂർ നിക്ഷേപം നിർബന്ധമാക്കിയിട്ടുള്ളതെന്ന് വ്യക്തമാണ്. എന്നാൽ സെക്ഷൻ 14-B പ്രകാരം നിശ്ചയിക്കുന്നത് കുടിശ്ശിക തുകയല്ല, മറിച്ച് നിയമലംഘനത്തിന് ചുമത്തുന്ന ശിക്ഷാനടപടിയായ ഡാമേജസ് ആണ്.

2020-ൽ കേന്ദ്ര പാർലമെന്റ് പാസാക്കുകയും 2025 നവംബർ 25-ന് പ്രാബല്യത്തിൽ വരികയും ചെയ്ത ‘കോഡ് ഓൺ സോഷ്യൽ സെക്യൂരിറ്റി 2020’ (Code on Social Security, 2020) പരിശോധിച്ചാലും ഇതേ നിയമതത്ത്വം തന്നെയാണ് കാണാൻ കഴിയുന്നത്. കോഡിലെ സെക്ഷൻ 23(3) പ്രകാരം കുടിശ്ശിക നിർണ്ണയത്തിനെതിരെയുള്ള (Section 125) അപ്പീലുകൾക്ക് മാത്രമാണ് മുൻകൂർ നിക്ഷേപം ബാധകം; ഡാമേജസ് നടപടികൾക്കെതിരെ (Section 128) അപ്പീൽ നൽകാൻ മുൻകൂർ നിക്ഷേപത്തിന്റെ ആവശ്യമില്ലെന്ന് ഹൈക്കോടതി ചൂണ്ടിക്കാട്ടി.

സ്റ്റേ അപേക്ഷകളിലെ വിവേചനാധികാരം

അതേസമയം, അപ്പീൽ ഹർജി സ്വീകരിക്കുന്നതിന് മുൻകൂർ പണമടയ്ക്കൽ നിർബന്ധമില്ലെങ്കിലും, ഹർജി തീർപ്പാകുന്നതുവരെ ഡിമാൻഡ് ഉത്തരവുകൾ സ്റ്റേ ചെയ്യുന്നതിന് യോഗ്യമായ ഉപാധികൾ ചുമത്താൻ ട്രൈബ്യൂണലിന് അധികാരമുണ്ടെന്നും കോടതി വ്യക്തമാക്കി. അപ്പീൽ സ്വീകരിക്കുന്നതിനായി പണം ആവശ്യപ്പെട്ട മുൻ ഉത്തരവുകൾ കോടതി റദ്ദാക്കി. അപ്പീലുകളിലെ ഇടക്കാല സ്റ്റേ ഹർജികൾ രണ്ട് മാസത്തിനകം വീണ്ടും പരിശോധിച്ച് ഉചിതമായ തീരുമാനമെടുക്കാൻ ലേബർ കോർട്ടിന് നിർദ്ദേശം നൽകി. അതുവരെ ഹർജിക്കാർക്കെതിരെയുള്ള ജപ്തി അടക്കമുള്ള റിക്കവറി നടപടികൾ നിർത്തിവെക്കാനും ഹൈക്കോടതി ഉത്തരവിട്ടു.