കോഴിക്കോട് റെയിൽവേ സ്റ്റേഷനിൽ വെച്ച് ട്രെയിൻ അപകടത്തിൽ ഇരു കാലുകളും നഷ്ടപ്പെട്ട യാത്രക്കാരന് അനുവദിച്ച 25 ലക്ഷം രൂപയുടെ നഷ്ടപരിഹാര വിധി കേരള ഹൈക്കോടതി റദ്ദാക്കി. റെയിൽവേ നൽകിയ അപ്പീൽ ഹർജി പരിഗണിച്ച ജസ്റ്റിസ് എസ്. മനുവാണ് എറണാകുളം റെയിൽവേ ക്ലെയിംസ് ട്രിബ്യൂണലിന്റെ മുൻ വിധി റദ്ദാക്കി കേസ് പുനഃപരിശോധിക്കാൻ ഉത്തരവിട്ടത്.

കേസിനാസ്പദമായ സംഭവം നടന്നത് 2010 നവംബർ 8-നാണ്. കോഴിക്കോട് ചേമ്പയിൽ സ്വദേശിയായ ശ്രീകാന്ത് (37) സുഹൃത്തുക്കളോടൊപ്പം മാഹിയിലേക്ക് പോകുന്നതിനായി കോഴിക്കോട് സ്റ്റേഷനിൽ എത്തിയിരുന്നു. നാലാം നമ്പർ പ്ലാറ്റ്‌ഫോമിൽ കിടന്ന കണ്ണൂർ പാസഞ്ചറിൽ കയറുന്നതിനായി മൂന്നാം നമ്പർ പ്ലാറ്റ്‌ഫോമിലൂടെ നടന്നു പോകുമ്പോൾ വഴുതി ട്രാക്കിലേക്ക് വീഴുകയായിരുന്നു എന്നാണ് ശ്രീകാന്തിന്റെ പരാതി.

പരുക്കേറ്റതിനെ തുടർന്ന് തല തറയിലിടിക്കുകയും, എഴുന്നേൽക്കാൻ സാധിക്കുന്നതിന് മുൻപ് ഗുഡ്സ് ട്രെയിൻ ഇദ്ദേഹത്തിന്റെ കാലുകളിലൂടെ കയറിയിറങ്ങുകയുമാണുണ്ടായത്. തുടർന്ന് ഇരു കാലുകളും മുറിച്ചുമാറ്റേണ്ടി വന്നു. റെയിൽവേയുടെ ഭാഗത്തുനിന്നുണ്ടായ അനാസ്ഥയ്ക്ക് 25 ലക്ഷം രൂപ നഷ്ടപരിഹാരം ആവശ്യപ്പെട്ടാണ് ഇദ്ദേഹം ട്രിബ്യൂണലിനെ സമീപിച്ചത്.

എന്നാൽ ശ്രീകാന്ത് റെയിൽവേ നിയമങ്ങൾ ലംഘിച്ചുകൊണ്ട് ട്രാക്കിലൂടെ അതിക്രമിച്ചു കയറി (Trespassing) യാത്ര ചെയ്യാൻ ശ്രമിച്ചതാണെന്ന് റെയിൽവേ വാദിച്ചു. ഫൂട്ട് ഓവർബ്രിഡ്ജ് ഉപയോഗിക്കാതെ പ്ലാറ്റ്‌ഫോം 3-ൽ നിന്നും 4-ലേക്ക് റെയിൽപാത വഴി നിയമവിരുദ്ധമായി കടക്കാൻ ശ്രമിച്ചപ്പോഴാണ് അപകടമുണ്ടായതെന്ന് ഗുഡ്സ് ട്രെയിനിലെ ലോക്കോ പൈലറ്റും സ്റ്റേഷൻ മാസ്റ്ററും നൽകിയ റിപ്പോർട്ടിൽ വ്യക്തമാക്കുന്നു.

റെയിൽവേ ആക്ടിലെ സെക്ഷൻ 147 പ്രകാരം ശിക്ഷാർഹമായ കുറ്റകൃത്യമാണ് റെയിൽപാതയിലൂടെയുള്ള അതിക്രമിച്ചു കടക്കൽ. അതിനാൽ സെക്ഷൻ 124A അനുസരിച്ച് നഷ്ടപരിഹാരം നൽകാൻ ബാധ്യതയില്ലെന്നാണ് റെയിൽവേയുടെ പ്രധാന പ്രതിരോധം.

ഈ വിഷയം വിശദമായി പരിശോധിക്കുന്നതിൽ എറണാകുളം റെയിൽവേ ക്ലെയിംസ് ട്രിബ്യൂണലിന് വലിയ പിഴവ് സംഭവിച്ചതായി ഹൈക്കോടതി വിലയിരുത്തി. കക്ഷികളിൽ നിന്ന് കൃത്യമായ തെളിവുകളോ സത്യവാങ്മൂലങ്ങളോ രേഖപ്പെടുത്താതെ കേവലം എഴുതി നൽകിയ വാദങ്ങൾ മാത്രം അടിസ്ഥാനമാക്കിയാണ് ട്രിബ്യൂണൽ 2017-ൽ വിധി പ്രസ്താവിച്ചത്. ഇത് സ്വാഭാവിക നീതിയുടെ നഗ്നമായ ലംഘനമാണെന്ന് കോടതി ചൂണ്ടിക്കാട്ടി.