ന്യൂഡൽഹി: ദമ്പതികൾ വേർപിരിയുമ്പോഴുള്ള ജീവനാംശ തുക (Maintenance Amount) കണക്കാക്കുമ്പോൾ ഭർത്താവിന്റെയോ ഭാര്യയുടെയോ അറ്റവരുമാനം (Net Disposable Income) തിട്ടപ്പെടുത്തുന്നതിൽ നിർണ്ണായക മാർഗ്ഗനിർദ്ദേശവുമായി സുപ്രീം കോടതി. പ്രൊവിഡന്റ് ഫണ്ട് (PF), എംപ്ലോയി സ്റ്റോക്ക് പർച്ചേസ് പ്ലാൻ (ESPP) എന്നിവ നിർബന്ധിത നികുതി പിടുത്തങ്ങളല്ലെന്നും, അവ വ്യക്തിഗത സമ്പാദ്യങ്ങളാണെന്നും സുപ്രീം കോടതി വ്യക്തമാക്കി. അതിനാൽ ഇവയെ പ്രതിമാസ വരുമാനത്തിൽ നിന്ന് കുറച്ച് കാണിക്കാൻ അനുവദിക്കില്ലെന്ന് ജസ്റ്റിസ് സഞ്ജയ് കരോൾ, ജസ്റ്റിസ് നോങ്മെയ്കാപം കോടീശ്വർ സിംഗ് എന്നിവരുടെ ബെഞ്ച് വിധി പ്രസ്താവിച്ചു.

ഡൽഹി ഹൈക്കോടതി വിധിക്കെതിരെ സമർപ്പിച്ച അപ്പീലിലാണ് സുപ്രീം കോടതിയുടെ ഈ ചരിത്രപരമായ ഉത്തരവ്. ആദായനികുതി (Income Tax), പ്രൊഫഷണൽ ടാക്സ് എന്നിവപോലെ പി.എഫും ഓഹരി നിക്ഷേപങ്ങളും നിർബന്ധിത ചെലവുകളല്ല. ഇവ നിക്ഷേപകന്റെ ഭാവി ആസ്തിയായി മാറുന്ന തുകകളായതിനാൽ നെറ്റ് വരുമാനം തിട്ടപ്പെടുത്തുമ്പോൾ ഒഴിവാക്കാനാകില്ലെന്ന് വിധിന്യായത്തിൽ ജസ്റ്റിസ് എൻ. കോടീശ്വർ സിംഗ് ചൂണ്ടിക്കാട്ടി.

കുട്ടികളുടെ ജീവനാംശം പ്രതിമാസം 1.5 ലക്ഷമായി വർദ്ധിപ്പിച്ചു

രണ്ട് പ്രായപൂർത്തിയാകാത്ത ആൺകുട്ടികളുടെ സംരക്ഷണത്തിനായി ഹൈക്കോടതി വിധിച്ച ₹ 1,25,000 രൂപ ജീവനാംശം സുപ്രീം കോടതി ₹ 1,50,000 രൂപയായി (കുട്ടിയൊന്നിന് ₹ 75,000/- വീതം) വർദ്ധിപ്പിച്ചു. 2025 ജനുവരി 1 മുതൽ ഇതിന് പ്രാബല്യമുണ്ടായിരിക്കും. മാതാപിതാക്കൾ അനുഭവിച്ചിരുന്ന അതേ ജീവിതനിലവാരത്തിനും സൗകര്യങ്ങൾക്കും കുട്ടികൾക്കും അർഹതയുണ്ടെന്ന് കോടതി നിരീക്ഷിച്ചു.

മാതാവിന്റെ ഗുരുതര രോഗാവസ്ഥയും ചികിത്സാ ചെലവുകളും

കുട്ടികളെ സംരക്ഷിക്കുന്ന മാതാവിന് ഗുരുതരമായ രോഗാവസ്ഥയുണ്ടെങ്കിൽ അത് ജീവനാംശം വർദ്ധിപ്പിക്കുന്നതിനുള്ള പ്രധാന ഘടകമാണെന്ന് സുപ്രീം കോടതി അടിവരയിട്ടു. അപ്പീൽ ഹർജിക്കാരിയായ ഭാര്യക്ക് ഗുരുതരമായ സ്തനാർബുദ രോഗനിർണ്ണയം (Aggressive Breast Cancer) നടത്തിയത് കണക്കിലെടുത്ത്, ഡൽഹി ഹൈക്കോടതി മുൻപ് ഇടക്കാല ഉത്തരവിലൂടെ അനുവദിച്ച ₹ 20,000 രൂപ വ്യക്തിഗത ജീവനാംശം സുപ്രീം കോടതി പ്രതിമാസം ₹ 30,000 രൂപയായി ഉയർത്തി.

കൂടാതെ, ദമ്പതികൾ സംയുക്തമായി ഉപയോഗിച്ചിരുന്ന മഹീന്ദ്ര XUV500 വാഹനത്തിന്റെ ഉടമസ്ഥാവകാശം ഭാര്യയുടെ പേരിലേക്ക് മാറ്റുന്നതടക്കമുള്ള വാഗ്ദാനങ്ങൾ മൂന്ന് മാസത്തിനകം ഭർത്താവ് പാലിക്കണമെന്നും സുപ്രീം കോടതി നിർദ്ദേശിച്ചു.