സിവിൽ കേസുകളുടെ വിചാരണ വേളയിൽ തടസ്സവാദങ്ങൾ ഉന്നയിച്ച് വിചാരണ തടസ്സപ്പെടുത്തുകയും പ്രമാണങ്ങൾ തുടക്കത്തിൽ തന്നെ നിരസിക്കാൻ ആവശ്യപ്പെടുകയും ചെയ്യുന്ന പുരാതന രീതികൾ അവസാനിപ്പിക്കണമെന്ന് സുപ്രീം കോടതി കർശന നിർദ്ദേശം നൽകി. പ്രമാണങ്ങൾ വിചാരണ കോടതിയിൽ ‘മാർക്ക്’ ചെയ്യുന്നതും അവയുടെ ഉള്ളടക്കത്തിലെ സത്യസന്ധത നിയമപരമായി തെളിയിക്കപ്പെടുന്നതും രണ്ടും വ്യത്യസ്തമായ ഘടകങ്ങളാണെന്ന് കോടതി വ്യക്തമാക്കി.

മദ്രാസ് ഹൈക്കോടതി വിധിക്കെതിരെ സമർപ്പിച്ച സിവിൽ അപ്പീൽ (SLP (C) No. 26326/2024) തള്ളിക്കൊണ്ടാണ് ജസ്റ്റിസ് സഞ്ജയ് കരോൾ, ജസ്റ്റിസ് നോങ്മെയ്കാപം കോട്ടീശ്വർ സിംഗ് എന്നിവരടങ്ങിയ ബെഞ്ച് ഈ സുപ്രധാന നിരീക്ഷണം നടത്തിയത്.

കേസിന്റെ പശ്ചാത്തലം:
മരിച്ചുപോയ സി. ശ്യാമളവല്ലി എന്നയാളുടെ വിൽപത്രം പ്രൊബേറ്റ് ചെയ്യുന്നതിനായി പി. പൊന്നി എന്ന വ്യക്തി 2019 ഒക്ടോബറിൽ മദ്രാസ് ഹൈക്കോടതിയിൽ ടി.ഒ.എസ് (T.O.S. No. 12/2021) ഹർജി ഫയൽ ചെയ്തിരുന്നു. ഇതിനെതിരെ എതിർകക്ഷിയായ എസ്. സംഗീതയും കൂട്ടരും ലിഖിത പ്രസ്താവന (Written Statement) നൽകി. തുടർന്ന് ഹർജിക്കാരി പ്രൂഫ് സത്യവാങ്മൂലവും (Proof Affidavit) അനുബന്ധ രേഖകളും ഹാജരാക്കി.

എന്നാൽ, പ്രൂഫ് സത്യവാങ്മൂലത്തിൽ ഉന്നയിച്ചിരിക്കുന്ന വിവരങ്ങളും ഹാജരാക്കിയ രേഖകളും വിൽപത്ര കേസുമായി ബന്ധമില്ലാത്തതാണെന്നും അതിനാൽ ഇവ പൂർണ്ണമായും ഒഴിവാക്കണമെന്നും (Eschew) ആവശ്യപ്പെട്ട് എതിർകക്ഷികൾ അപേക്ഷ (Application No. 4262/2022) നൽകുകയായിരുന്നു.

ഹൈക്കോടതിയും സുപ്രീം കോടതിയും കണ്ടെത്തിയത്

ഹൈക്കോടതി സിംഗിൾ ബെഞ്ച് അപേക്ഷ ഭാഗികമായി മാത്രം അനുവദിച്ചു. വിശദീകരണമില്ലാതെ ഹാജരാക്കിയ ഫോട്ടോകോപ്പികൾ (Xerox Copies) തെളിവായി സ്വീകരിക്കില്ലെന്ന് വ്യക്തമാക്കി അത് ഒഴിവാക്കി. എന്നാൽ, കുടുംബ സ്വത്തുക്കളുമായി ബന്ധപ്പെട്ട മറ്റ് ആധാരങ്ങളും നിലവിലുള്ള കേസുകളുടെ രേഖകളും തുടക്കത്തിലേ തള്ളാനാകില്ലെന്ന് വിധി പ്രസ്താവിച്ചു. ഇതിനെതിരെ സമർപ്പിച്ച ഒറിജിനൽ സൈഡ് അപ്പീലും (OSA No. 31/2023) ഹൈക്കോടതി ഡിവിഷൻ ബെഞ്ച് തള്ളിയിരുന്നു.

‘ബിപിൻ ശാന്തിലാൽ പഞ്ചാൽ’ കേസിന്റെ പ്രസക്തി

വിചാരണ വേളയിൽ ഉയരുന്ന തെളിവ് തടസ്സവാദങ്ങൾ കേസ് നീട്ടിക്കൊണ്ടുപോകാൻ കാരണമാകുന്നു എന്ന് കോടതി ചൂണ്ടിക്കാട്ടി. ബിപിൻ ശാന്തിലാൽ പഞ്ചാൽ വി. സ്റ്റേറ്റ് ഓഫ് ഗുജറാത്ത് (2001) കേസിലെ മൂന്നംഗ ബെഞ്ചിന്റെ നിർണ്ണായക വിധി സുപ്രീം കോടതി വീണ്ടും ഓർമ്മിപ്പിച്ചു.

സ്റ്റാമ്പ് ഡ്യൂട്ടി പോരായ്മയുള്ള രേഖകൾ ഒഴികെ മറ്റെല്ലാ തടസ്സവാദങ്ങളിലും, രേഖ താൽക്കാലികമായി മാർക്ക് ചെയ്ത് വിചാരണ പൂർത്തിയാക്കണം. അന്തിമ വിധി പ്രസ്താവത്തിൽ മാത്രമായിരിക്കണം തെളിവുകളുടെ പ്രവേശനീയത വിചാരണ കോടതികൾ തീരുമാനിക്കേണ്ടത്.