ന്യൂഡൽഹി: ഇന്ത്യൻ റെയിൽവേയിലെ മെയിൽ/എക്സ്പ്രസ്സ് ഗാർഡുമാർ അടക്കമുള്ള ജീവനക്കാർക്ക് എം.എ.സി.പി സ്കീം (MACPS) പ്രകാരം നിലവിലുള്ള ഗ്രേഡ് പേ ആയ 4200 രൂപയ്ക്ക് മുകളിൽ സാമ്പത്തിക ആനുകൂല്യം ലഭിക്കാൻ അർഹതയില്ലെന്ന് സുപ്രീം കോടതി വിധിച്ചു. രാജസ്ഥാൻ ഹൈക്കോടതിയുടെയും കേന്ദ്ര അഡ്മിനിസ്ട്രേറ്റീവ് ട്രൈബ്യൂണലിന്റെയും (CAT) ഉത്തരവുകൾ തള്ളിക്കൊണ്ടാണ് ജസ്റ്റിസ് അഗസ്റ്റിൻ ജോർജ് മാസിഹ്, ജസ്റ്റിസ് സഞ്ജയ് കരോൾ എന്നിവരടങ്ങിയ ഡിവിഷൻ ബെഞ്ചിന്റെ നിർണ്ണായക വിധി പ്രസ്താവം. (Civil Appeal @ SLP (C) No. 35363/2025).

കേസിന്റെ പശ്ചാത്തലവും തർക്കവും

1976-ൽ വേസ്റ്റ് സെൻട്രൽ റെയിൽവേയിൽ ഗുഡ്സ് ഗാർഡായി സർവീസിൽ പ്രവേശിച്ച ഹർബൻസ് ലാൽ വർമ്മ എന്ന ജീവനക്കാരന്റെ ഹർജിയിലാണ് കേസിന്റെ തുടക്കം. തുടർച്ചയായ സ്ഥാനക്കയറ്റങ്ങളിലൂടെ അദ്ദേഹം പാസഞ്ചർ ഗാർഡ്, മെയിൽ/എക്സ്പ്രസ്സ് ഗാർഡ് എന്നീ തസ്തികകളിൽ എത്തുകയും 2009-ൽ വിരമിക്കുകയും ചെയ്തു. ആറാം ശമ്പള കമ്മീഷൻ നടപ്പിലാക്കിയതോടെ ഗാർഡ് കേഡറിലെ ഗുഡ്സ് ഗാർഡ് ഒഴികെയുള്ള തസ്തികകളെല്ലാം പെയ് ബാൻഡ് PB-2 ൽ 4200 രൂപ എന്ന ഏകീകൃത ഗ്രേഡ് പേയിലേക്ക് മാറ്റിയിരുന്നു.

തുടർന്ന് 2009-ൽ റെയിൽവേ ബോർഡ് പുറപ്പെടുവിച്ച MACPS സ്കീം അനുസരിച്ച് 10, 20, 30 വർഷത്തെ സർവീസിന് സാമ്പത്തിക പുരോഗതി (Financial Upgradation) വ്യവസ്ഥ ചെയ്തിരുന്നു. ഇതിന്റെ അടിസ്ഥാനത്തിൽ ഹർജിക്കാരന് ഗ്രേഡ് പേ 4600, 4800 എന്നിവ അനുവദിച്ചിരുന്നുവെങ്കിലും, 2011-ലെ റയിൽവേ സർക്കുലർ (RBE No. 76/2011) ചൂണ്ടിക്കാട്ടി റെയിൽവേ അധികൃതർ ഇത് റദ്ദാക്കി.

ഖണ്ഡിക 8 ഉം ഖണ്ഡിക 5 ഉം: കോടതിയുടെ നിയമ വ്യാഖ്യാനം

പഴയ സ്ഥാനക്കയറ്റങ്ങൾ ലയിപ്പിച്ച ഗ്രേഡ് പേയിൽ വരുന്നതിനാൽ അവ അവഗണിക്കണമെന്ന ഖണ്ഡിക 5 (Paragraph 5) ലെ വിശദീകരണം തങ്ങൾക്ക് ബാധകമാണെന്ന ജീവനക്കാരുടെ വാദം കോടതി തള്ളി. ഖണ്ഡിക 8 പ്രകാരം, സർവീസ് റൂളുകൾ അനുസരിച്ച് ഒരേ ഗ്രേഡ് പേയിലുള്ള തസ്തികകളിലേക്ക് ലഭിക്കുന്ന സ്ഥാനക്കയറ്റങ്ങളും MACPS കണക്കുകൂട്ടലിൽ പ്രൊമോഷനായി തന്നെ പരിഗണിക്കും.

ഗാർഡ് കേഡറിൽ ഓരോ സ്ഥാനക്കയറ്റത്തിലും ഉത്തരവാദിത്തങ്ങളും റണ്ണിംഗ് അലവൻസുകളും (Running Allowances) വർദ്ധിക്കുന്നുണ്ട്. അതിനാൽ ഇവർ സാമ്പത്തികമായി സ്തബ്ധത (Financial Stagnation) അനുഭവിക്കുന്ന ജീവനക്കാരുടെ ഗണത്തിൽ പെടുന്നില്ലെന്ന് കോടതി വ്യക്തമാക്കി. മെയിൽ/എക്സ്പ്രസ്സ് ഗാർഡ് തസ്തികയിലെത്തിയ ഒരാൾക്ക് ആ കേഡറിലെ ഏറ്റവും ഉയർന്ന തസ്തികയേക്കാൾ കൂടുതൽ ഗ്രേഡ് പേ നൽകുന്നത് കേഡർ ഘടനയ്ക്ക് വിരുദ്ധമാണെന്നും വിധിയിൽ ചൂണ്ടിക്കാട്ടി.

വിരമിച്ച ജീവനക്കാർക്ക് വലിയ ആശ്വാസം

നിയമപരമായ തത്വം കേന്ദ്ര സർക്കാരിന് അനുകൂലമായി പ്രഖ്യാപിച്ചെങ്കിലും, ഹർജിക്കാരൻ ഉൾപ്പെടെ വിരമിച്ച ജീവനക്കാരിൽ നിന്ന് മുൻപ് നൽകിയ തുക തിരിച്ചടവ് (Recovery) ചെയ്യില്ലെന്ന അഡീഷണൽ സോളിസിറ്റർ ജനറലിന്റെ ഉറപ്പ് സുപ്രീം കോടതി റെക്കോർഡ് ചെയ്തു. സമാനമായി ട്രൈബ്യൂണൽ/ഹൈക്കോടതി ഉത്തരവുകൾ വഴി ആനുകൂല്യം ലഭിച്ച് കേസ് പൂർണ്ണമായി അവസാനിപ്പിച്ച ജീവനക്കാരുടെ കാര്യത്തിലും തിരിച്ചുപിടിക്കൽ ഉണ്ടാകില്ല.