കൊച്ചി: 1995-ൽ സമർപ്പിച്ച അപേക്ഷയിൽ റവന്യൂ ഡിവിഷണൽ ഓഫീസർ (ആർ.ഡി.ഒ) നിയമപരമായി നൽകിയ കെ.എൽ.യു (Kerala Land Utilisation Order, 1967) ഉത്തരവ് 30 വർഷത്തിന് ശേഷം ലാൻഡ് റവന്യൂ കമ്മീഷണർ റദ്ദാക്കിയത് ഹൈക്കോടതി പൂർണ്ണമായും തള്ളി. കോടതിയലക്ഷ്യ നടപടികളിൽ നിന്ന് തടിയൂരാൻ റവന്യൂ അധികൃതർ ബോധപൂർവം നടത്തിയ തന്ത്രമാണ് അപ്പീൽ സമർപ്പണമെന്ന് നിരീക്ഷിച്ചാണ് ജസ്റ്റിസ് ഹരിശങ്കർ വി. മേനോൻ ഉത്തരവ് പുറപ്പെടുവിച്ചത്.

മുംബൈയിൽ താമസിക്കുന്ന വേങ്ങേരി വില്ലേജ് സ്വദേശിനി ജ്യോതി കൃഷ്ണൻ (62) സമർപ്പിച്ച റിട്ട് ഹരജിയിലാണ് (W.P.(C) No. 31150/2025) ഹൈക്കോടതിയുടെ ഈ സുപ്രധാന വിധി. റവന്യൂ അധികൃതരുടെ അന്യായമായ നടപടിക്കെതിരെ കടുത്ത ഭാഷയിലാണ് കോടതി വിമർശനമുന്നയിച്ചത്.

“നിയമപരമായ പരിഹാരം തേടാൻ ഒരു നിശ്ചിത കാലയളവ് നിയമം അനുശാസിക്കുന്നുണ്ട്. അനാവശ്യമായ കാലതാമസം അനിശ്ചിതത്വത്തിനും അരാജകത്വത്തിനും വഴിവെക്കും. കോടതിയലക്ഷ്യ കേസിൽ കർശന നിലപാടെടുത്തപ്പോൾ മാത്രമാണ് 30 വർഷത്തെ പഴക്കമുള്ള ഉത്തരവിനെതിരെ സർക്കാർ അപ്പീൽ നൽകിയത്. ഇത് കേവലം നിയമനടപടികൾ വൈകിപ്പിക്കാനുള്ള തന്ത്രം മാത്രമാണ്.”

കേസിന്റെ പശ്ചാത്തലം: 1994 മുതൽ ആരംഭിച്ച നിയമപോരാട്ടം

കോഴിക്കോട് ജില്ലയിലെ വേങ്ങേരി വില്ലേജിൽ സർവേ നമ്പർ 65/4, 66/12, 66/9 എന്നിവയിൽപ്പെട്ട 148.82 സെന്റ് ഭൂമിയുടെ ഉടമസ്ഥയായ ഹരജിക്കാരി, ഭൂമിയുടെ തരം മാറ്റുന്നതിനായി 1994-ൽ KLU ഉത്തരവിലെ ക്ലോസ് 6(2) പ്രകാരം അപേക്ഷ നൽകിയിരുന്നു. തുടർന്ന് ആർ.ഡി.ഒ നടത്തിയ സ്ഥലപരിശോധനയിലും അന്വേഷണത്തിലും ഈ വസ്തു നെൽകൃഷിക്ക് അനുയോജ്യമല്ലെന്നും അയൽവസ്തുക്കൾക്ക് തടസ്സമുണ്ടാക്കില്ലെന്നും കണ്ടെത്തി.

ഇതിനെത്തുടർന്ന് 88.82 സെന്റ് വസ്തുവിന് 14.05.1995-ൽ (Ext.P1) ഉത്തരവും, ബാക്കി 60 സെന്റ് വസ്തുവിന് 30.10.1995-ൽ (Ext.P2) ഉത്തരവും ആർ.ഡി.ഒ അനുവദിച്ചു നൽകി.

ഡാറ്റാ ബാങ്ക് തെറ്റായി നിർമ്മിച്ചു; 2020-ൽ വിധി വന്നിട്ടും തിരുത്തിയില്ല

തുടർന്ന് 2008-ലെ കേരള നെൽവയൽ-തണ്ണീർത്തട സംരക്ഷണ നിയമം പ്രാബല്യത്തിൽ വന്നപ്പോൾ, കെ.എൽ.യു അനുമതിയുള്ള ഈ വസ്തു തെറ്റായി ഡാറ്റാ ബാങ്കിൽ ഉൾപ്പെടുത്തി. ഇത് ഒഴിവാക്കാൻ ലോക്കൽ ലെവൽ മോണിറ്ററിംഗ് കമ്മിറ്റിയെ (LLMC) സമീപിച്ചെങ്കിലും അപേക്ഷ നിരസിക്കപ്പെട്ടു.

ഇതിനെതിരെ ഹരജിക്കാരി ഹൈക്കോടതിയെ സമീപിക്കുകയും (W.P.(C) No. 15862/2020), 2020 ഓഗസ്റ്റ് 20-ന് കേസ് തീർപ്പാക്കിക്കൊണ്ട് തടസ്സങ്ങൾ നീക്കി ഡാറ്റാ ബാങ്കിൽ നിന്ന് ഭൂമി ഒഴിവാക്കാൻ ഹൈക്കോടതി വ്യക്തമായി ഉത്തരവിടുകയും ചെയ്തു (Ext.P4). കെ.എൽ.യു അനുമതി നൽകിയ നടപടി അന്തിമമാണെന്നും വസ്തുതാപരമായ കണ്ടെത്തലുകൾ വീണ്ടും ചോദ്യം ചെയ്യാൻ സർക്കാരിന് കഴിയില്ലെന്നും ഹൈക്കോടതി അന്ന് അടിവരയിട്ടു പറഞ്ഞിരുന്നു.

കോടതിയലക്ഷ്യ കേസും റവന്യൂ കമ്മീഷണറുടെ വിചിത്ര അപ്പീലും

2020-ലെ ഹൈക്കോടതി ഉത്തരവ് നടപ്പാക്കുന്നതിന് പകരം, സബ് കളക്ടർ ഫോം 5 അപേക്ഷ സമർപ്പിക്കാൻ ഹരജിക്കാരിയോട് ആവശ്യപ്പെടുകയും അപേക്ഷയിൽ വീണ്ടും തടസ്സങ്ങൾ ഉന്നയിക്കുകയും ചെയ്തു. ഇതേത്തുടർന്ന് ഹരജിക്കാരി കോടതിയലക്ഷ്യ ഹരജി (Contempt Case (C) No. 22/2025) നൽകി.

കോടതിയലക്ഷ്യ കേസിൽ ഹൈക്കോടതി ഇടക്കാല ഉത്തരവിലൂടെ (Ext.P19 – 07.04.2025) കർശന നിലപാടെടുത്ത് മൂന്നാഴ്ചയ്ക്കുള്ളിൽ വിധി നടപ്പാക്കാൻ ഉത്തരവിട്ടു. വിചാരണയിൽ നിന്ന് രക്ഷപ്പെടാൻ റവന്യൂ വകുപ്പ് പെട്ടെന്ന് 1995-ലെ കെ.എൽ.യു ഉത്തരവുകൾക്കെതിരെ ലാൻഡ് റവന്യൂ കമ്മീഷണർക്ക് അപ്പീൽ നൽകുകയായിരുന്നു. സർക്കാരിന് ഉത്തരവ് ലഭിച്ചത് 2025 ജനുവരിയിൽ മാത്രമാണെന്ന കാരണം പറഞ്ഞ് ലാൻഡ് റവന്യൂ കമ്മീഷണർ Ext.P24 ഉത്തരവിലൂടെ 30 വർഷത്തെ കാലതാമസം മാപ്പാക്കി കെ.എൽ.യു ഉത്തരവുകൾ റദ്ദാക്കി.

സുപ്രീം കോടതി വിധി ഉദ്ധരിച്ച് ഹൈക്കോടതി

എന്നാൽ, കാലതാമസം മാപ്പാക്കുന്ന വിഷയത്തിൽ സുപ്രീം കോടതിയുടെ പ്രശസ്തമായ N.Balakrishnan v. M.Krishnamurthy [(1998) 7 SCC 123] വിധി ഉദ്ധരിച്ച് ജസ്റ്റിസ് ഹരിശങ്കർ വി. മേനോൻ ഈ വാദം പൂർണ്ണമായും നിരസിച്ചു. 2020-ൽ ഹൈക്കോടതി വിധിയുണ്ടായപ്പോൾ തന്നെ സർക്കാരിന് കെ.എൽ.യു ഉത്തരവിനെക്കുറിച്ച് വ്യക്തമായ വിവരമുണ്ടായിരുന്നു. അതിനുശേഷവും 5 വർഷം കഴിഞ്ഞ് കോടതിയലക്ഷ്യ കേസ് വന്നപ്പോൾ മാത്രം അപ്പീൽ നൽകിയത് കേവലം വിചാരണ ഒഴിവാക്കാനുള്ള സൂത്രപ്പണിയാണെന്ന് കോടതി കണ്ടെത്തി.

ഇതിൻപ്രകാരം ലാൻഡ് റവന്യൂ കമ്മീഷണറുടെ Ext.P24 റദ്ദാക്കിയ ഹൈക്കോടതി, 2020 ഓഗസ്റ്റിലെ വിധിയുടെ അടിസ്ഥാനത്തിൽ നാല് ആഴ്ചയ്ക്കുള്ളിൽ ഭൂമി ഡാറ്റാ ബാങ്കിൽ നിന്ന് ഒഴിവാക്കുന്നതുൾപ്പെടെയുള്ള നടപടികൾ പൂർത്തിയാക്കാൻ സർക്കാരിനോട് ഉത്തരവിട്ടു.