ന്യൂഡൽഹി: ദാമ്പത്യ തർക്കങ്ങൾ മൂലം ഉടലെടുത്ത ക്രിമിനൽ കേസിൽ ഭർത്താവിനും ഭാര്യക്കും ഇടയിൽ ഉണ്ടായ പൂർണ്ണമായ ഒത്തുതീർപ്പ് അംഗീകരിച്ച് പ്രതിയെ സുപ്രീം കോടതി വെറുതെവിട്ടു. 2011-ൽ ഭാര്യയെ തടിയുരുപ്പടി കൊണ്ട് അടിച്ച് പരിക്കേല്പിച്ച കേസിൽ രണ്ട് വർഷം തടവിന് ശിക്ഷിക്കപ്പെട്ട കർണാടക മാണ്ഡ്യ സ്വദേശി മഹാദേവയ്യാ സമർപ്പിച്ച അപ്പീലിലാണ് ജസ്റ്റിസ് അരവിന്ദ് കുമാർ, ജസ്റ്റിസ് പ്രസന്ന ബി. വരാലെ എന്നിവരടങ്ങിയ ഡിവിഷൻ ബെഞ്ചിന്റെ സുപ്രധാന നടപടി (Criminal Appeal No. … of 2026 / SLP Crl. No. 8566/2026).

ഇന്ത്യൻ ശിക്ഷാ നിയമം (IPC) 326-ാം വകുപ്പ് പ്രകാരമുള്ള ഗുരുതരമായ പരിക്കേല്പിക്കൽ സാധാരണഗതിയിൽ സി.ആർ.പി.സി (CrPC) 320-ാം വകുപ്പ് പ്രകാരം ഒത്തുതീർപ്പാക്കാവുന്ന കുറ്റമല്ല. എന്നാൽ, കക്ഷികൾ ഭർത്താവും ഭാര്യയുമാണെന്നതും, മുതിർന്നവരുടെ ഇടപെടൽ മൂലം തർക്കങ്ങൾ പരിഹരിച്ച് ഇരുവരും ഇപ്പോൾ സമാധാനപരമായി ഒന്നിച്ച് ജീവിക്കുകയാണെന്നതും കണക്കിലെടുത്ത് ഭരണഘടനയുടെ 142-ാം അനുച്ഛേദം നൽകുന്ന സവിശേഷ അധികാരം ഉപയോഗിച്ചാണ് സുപ്രീം കോടതി വിധി പുറപ്പെടുവിച്ചത്.

എന്നാൽ സുപ്രീം കോടതിയിൽ കേസ് പരിഗണനയിലിരിക്കെ, ദമ്പതികൾ സംയുക്തമായി ഒത്തുതീർപ്പ് ഹർജി (I.A. No. 119646/2026) ഫയൽ ചെയ്യുകയായിരുന്നു. കുടുംബാംഗങ്ങളുടെയും നാട്ടുമൂപ്പന്മാരുടെയും മധ്യസ്ഥതയിൽ തർക്കങ്ങളെല്ലാം പരിഹരിച്ചെന്നും, ഇപ്പോൾ സന്തോഷത്തോടെ ഒരുമിച്ച് ജീവിക്കുന്നുവെന്നും പരാതിക്കാരിയായ ഭാര്യ വീഡിയോ കോൺഫറൻസിംഗിലൂടെ കോടതിയെ അറിയിച്ചു. അഭിഭാഷകൻ ശ്രീ ശശി കുമാർ പരാതിക്കാരിയെ തിരിച്ചറിഞ്ഞു.

ഭാര്യക്ക് ഇനി കേസുമായി മുന്നോട്ട് പോകാൻ താല്പര്യമില്ലെന്നും, ഭർത്താവിന്റെ ശിക്ഷ റദ്ദാക്കുന്നതിൽ എതിർപ്പില്ലെന്നും കോടതിയെ ബോധിപ്പിച്ചു. പബ്ലിക് പ്രോസിക്യൂട്ടർ ഒത്തുതീർപ്പിനെ എതിർത്തുവെങ്കിലും പൂർണ്ണ നീതി നടപ്പാക്കുന്നതിനായി അപ്പീൽ അനുവദിക്കാനും പ്രതിയെ തടവിൽ നിന്ന് ഉടൻ മോചിപ്പിക്കാനും സുപ്രീം കോടതി ഉത്തരവിട്ടു.