ന്യൂഡൽഹി: ഔദ്യോഗിക രഹസ്യനിയമം (Official Secrets Act – OSA) ചുമത്തി കേസ്സെടുത്തതുകൊണ്ട് മാത്രം കുറ്റപത്രത്തോടൊപ്പം പ്രോസിക്യൂഷൻ ഹാജരാക്കിയ രേഖകളുടെ പകർപ്പ് പ്രതിക്ക് നിഷേധിക്കാനാവില്ലെന്ന് സുപ്രീം കോടതി വ്യക്തമാക്കി. ന്യായമായ വിചാരണയ്ക്കുള്ള പ്രതിയുടെ ഭരണഘടനാപരമായ അവകാശം (ഭരണഘടനയുടെ ആർട്ടിക്കിൾ 21) സംരക്ഷിക്കപ്പെടേണ്ടതുണ്ടെന്ന് ചൂണ്ടിക്കാട്ടിയാണ് സുപ്രീം കോടതി വിധി.

മുൻ ക്യാബിനറ്റ് സെക്രട്ടേറിയറ്റിൽ (RAW) ജോയിന്റ് സെക്രട്ടറിയായിരുന്ന വിരമിച്ച മേജർ ജനറൽ വി.കെ. സിംഗ് സമർപ്പിച്ച പ്രത്യേക അനുമതി അപ്പീൽ (Criminal Appeal Nos. of 2026 – Arising out of SLP (Crl.) No.19493-19494 of 2025) അംഗീകരിച്ചുകൊണ്ടാണ് ജസ്റ്റിസ് ജെ.കെ. മഹേശ്വരി, ജസ്റ്റിസ് അതുൽ എസ്. ചന്ദൂർക്കർ എന്നിവരടങ്ങിയ ഡിവിഷൻ ബെഞ്ചിന്റെ സുപ്രധാന ഉത്തരവ്.

കേസിന്റെ പശ്ചാത്തലം

2007-ൽ മേജർ ജനറൽ വി.കെ. സിംഗ് “India’s External Intelligence – Secrets of Research and Analysis Wing (RAW)” എന്ന പേരിൽ ഒരു പുസ്തകം പ്രസിദ്ധീകരിച്ചിരുന്നു. റോ (RAW) സംഘടനയിലെ രഹസ്യ വിവരങ്ങൾ, ഉദ്യോഗസ്ഥരുടെ പേരുകൾ, തസ്തികകൾ, സിഗ്നൽസ് ഇന്റലിജൻസ്, സാങ്കേതിക പ്രോജക്റ്റുകൾ എന്നിവ പുറത്തുവിട്ടുവെന്ന് ആരോപിച്ച് സി.ബി.ഐ കേസ്സെടുക്കുകയായിരുന്നു. ഔദ്യോഗിക രഹസ്യ നിയമത്തിലെ 3, 5 വകുപ്പുകളും ഇന്ത്യൻ ശിക്ഷാനിയമത്തിലെ (IPC) 409, 120B വകുപ്പുകളും അനുസരിച്ചായിരുന്നു കുറ്റപത്രം.

2008 ഏപ്രിൽ 11-ന് സി.ബി.ഐ വിചാരണക്കോടതിയിൽ സമർപ്പിച്ച കുറ്റപത്രത്തിലെ സുപ്രധാന രേഖകൾ രഹസ്യ കവറിൽ സൂക്ഷിക്കാൻ ആവശ്യപ്പെടുകയും കോടതി അത് അംഗീകരിക്കുകയും ചെയ്തു. തുടർന്ന്, ക്രിമിനൽ നടപടിക്രമത്തിലെ 207-ാം വകുപ്പ് (CrPC Sec 207) പ്രകാരം തനിക്ക് ഈ രേഖകൾ നൽകണമെന്ന് പ്രതി വിചാരണക്കോടതിയിൽ ആവശ്യപ്പെട്ടു.

കീഴ്ക്കോടതി വിധികളും സുപ്രീം കോടതിയുടെ ഇടപെടലും

തിസ് ഹസാരി ചീഫ് മെട്രോപൊളിറ്റൻ മജിസ്‌ട്രേറ്റ് കോടതി (Trial Court) 2009 ഡിസംബർ 12-ന് പുറപ്പെടുവിച്ച ഉത്തരവിൽ, പ്രോസിക്യൂഷനോട് രേഖകളുടെ പകർപ്പുകൾ ടൈപ്പ് ചെയ്ത് പ്രതിഭാഗം വക്കീലിന് നൽകാൻ നിർദ്ദേശിച്ചിരുന്നു. എന്നാൽ ഈ രേഖകൾ അഭിഭാഷകന്റെ വ്യക്തിഗത കസ്റ്റഡിയിൽ സൂക്ഷിക്കണമെന്നും പുറത്തുവിടരുതെന്നും വ്യവസ്ഥയുണ്ടായിരുന്നു.

എന്നാൽ പ്രോസിക്യൂഷൻ സമർപ്പിച്ച ഹർജിയിൽ ഡൽഹി ഹൈക്കോടതി വിചാരണക്കോടതി ഉത്തരവ് തിരുത്തുകയും, പ്രതിക്ക് രേഖകളുടെ പകർപ്പ് നൽകേണ്ടതില്ലെന്നും കോടതിയിൽ നേരിട്ടെത്തി പരിശോധിക്കാൻ (Inspection) മാത്രമേ അനുമതിയുള്ളൂവെന്നും വിധിപ്പിച്ചു (19.09.2025). ഇതിനെതിരെയാണ് വി.കെ. സിംഗ് സുപ്രീം കോടതിയെ സമീപിച്ചത്.

ഭരണഘടനാ തത്ത്വവും ‘സത്യേൻ ഭൗമിക്’ വിധിന്യായവും

സുപ്രീം കോടതി വിധിന്യായത്തിൽ, 1981-ലെ സുപ്രധാന വിധിയായ State of West Bengal v. Satyen Bhowmick (1981 2 SCC 109) കേസ് എടുത്തുപറഞ്ഞു. ഔദ്യോഗിക രഹസ്യനിയമത്തിലെ 14-ാം വകുപ്പ് ചൂണ്ടിക്കാട്ടി പ്രോസിക്യൂഷൻ രേഖകൾ പ്രതിഭാഗത്തിന് നൽകാതിരിക്കുന്നത് ഭരണഘടനയുടെ ഭാഗം III ഉന്നയിക്കുന്ന മൗലികാവകാശങ്ങൾക്ക് വിരുദ്ധമാണെന്ന് കോടതി വ്യക്തമാക്കി.

ദേശീയ സുരക്ഷയും പ്രതിയുടെ ന്യായമായ വിചാരണാവകാശവും തമ്മിൽ തുലനം ചെയ്യേണ്ടതുണ്ടെന്ന് കോടതി അഭിപ്രായപ്പെട്ടു. ഇതിന്റെ അടിസ്ഥാനത്തിൽ അഡീഷണൽ സോളിസിറ്റർ ജനറൽ (ASG) ഡി.പി. സിംഗ് മുന്നോട്ടുവെച്ച നിർദ്ദേശം കോടതി അംഗീകരിച്ചു.

ഹർജിക്കാരന് വേണ്ടി പ്രമുഖ അഭിഭാഷകൻ പ്രശാന്ത് ഭൂഷണും, സി.ബി.ഐക്ക് വേണ്ടി അഡീഷണൽ സോളിസിറ്റർ ജനറൽ ഡി.പി. സിംഗും ഹാജരായി.