കൊല്ലം/എറണാകുളം: പ്രീഡിഗ്രി ഡീലിങ്ക് ചെയ്തതിനെ തുടർന്ന് എയ്ഡഡ് ആർട്സ് ആൻഡ് സയൻസ് കോളേജുകളിൽ ആരംഭിച്ച പുനഃസംഘടിപ്പിച്ച (Restructured) കോഴ്സുകളിൽ ദീർഘകാലമായി സേവനമനുഷ്ഠിക്കുന്ന അധ്യാപകരെ സംബന്ധിച്ച് നിർണ്ണായക വിധിയുമായി ഹൈക്കോടതി. കൊല്ലം എസ്.എൻ. കോളേജിലെ കമ്പ്യൂട്ടർ ആപ്ലിക്കേഷൻ വിഭാഗം അധ്യാപിക സുകി പി. രാജ് സമർപ്പിച്ച റിട്ട് ഹർജിയിലാണ് ഹൈക്കോടതി ജസ്റ്റിസ് ഹരിശങ്കർ വി. മേനോന്റെ ഏകാംഗ ബെഞ്ച് വിധി പ്രസ്താവിച്ചത്.

ഹർജിക്കാരിയെ ഡയറക്ട് പേയ്മെന്റ് സ്കീമിൽ (Direct Payment Scheme) ഉൾപ്പെടുത്തി സർവീസ് സ്ഥിരപ്പെടുത്തണമെന്ന ആവശ്യം തള്ളിക്കൊണ്ട് സർക്കാർ പുറപ്പെടുവിച്ച G.O.(P) No.207/2022/HEDN (Ext.P31) ഉത്തരവ് കോടതി പൂർണ്ണമായി റദ്ദാക്കി. ഉത്തരവ് തീയതി മുതൽ ഒരു മാസത്തിനകം ഹർജിക്കാരിയെ ഡയറക്ട് പേയ്മെന്റിൽ ഉൾപ്പെടുത്തി സർവീസ് ക്രമവത്കരിക്കാനും, മൂന്ന് മാസത്തിനകം കുടിശ്ശിക ആനുകൂല്യങ്ങൾ നൽകാനും ഹൈക്കോടതി സർക്കാരിന് കടുത്ത നിർദ്ദേശം നൽകി.

കേസിന്റെ പശ്ചാത്തലവും നാൾവഴിയും

1997-ൽ കോളേജുകളിൽ നിന്ന് പ്രീഡിഗ്രി വേർപെടുത്തിയപ്പോൾ ഒട്ടേറെ അധ്യാപകർ മിച്ചമായി. ഇവരെ പുനരധിവസിപ്പിക്കാനും പ്രതിസന്ധി പരിഹരിക്കാനുമായി സാമ്പത്തിക ബാധ്യത വരുത്തിവെക്കില്ലെന്ന വ്യവസ്ഥയോടെ 1998-ൽ 440 പുനഃസംഘടിപ്പിച്ച കോഴ്സുകൾ ആരംഭിക്കാൻ സർക്കാർ അനുമതി നൽകി (G.O.(Ms) No.134/98/H.Edn). ഇതിന്റെ ഭാഗമായി കൊല്ലം എസ്.എൻ. കോളേജിൽ ‘ബി.എസ്.സി ഫിസിക്സ് (കമ്പ്യൂട്ടർ ആപ്ലിക്കേഷൻ)’ കോഴ്സ് ആരംഭിച്ചു.

തുടർന്ന് 2004 ജൂൺ 3-ന് ഹർജിക്കാരിയായ സുകി പി. രാജ് കോളേജിൽ കമ്പ്യൂട്ടർ ആപ്ലിക്കേഷൻ അധ്യാപികയായി ചുമതലയേറ്റു. 2010-ൽ സർക്കാർ 1599 തസ്തികകൾ സൃഷ്ടിക്കുകയും 1012 അധ്യാപക തസ്തികകളിൽ നിയമനത്തിന് അനുമതി നൽകുകയും ചെയ്തു (G.O.(Ms) No.260/2010/H.Edn – Ext.P2). എന്നാൽ, എസ്.എൻ. കോളേജിൽ നടന്നിരുന്ന കമ്പ്യൂട്ടർ ആപ്ലിക്കേഷൻ കോഴ്സിലേക്ക് തസ്തിക അനുവദിച്ചപ്പോൾ കമ്പ്യൂട്ടർ ആപ്ലിക്കേഷന് പകരം ‘ഫിസിക്സ്’ വിഭാഗത്തിലാണ് സർക്കാർ തസ്തികകൾ അനുവദിച്ചത്.

ഇത് സർക്കാരിന്റെ ഭാഗത്തുനിന്നുണ്ടായ അക്ഷന്തവ്യമായ പിഴവായിരുന്നുവെന്ന് വിധിന്യായത്തിൽ വ്യക്തമാക്കുന്നു. പിന്നീട് നീണ്ട 9 വർഷങ്ങൾക്ക് ശേഷം 2019-ൽ മാത്രമാണ് (G.O.(Ms) No.366/2019 – Ext.P4) സർക്കാർ ഈ തെറ്റ് തിരുത്തി 2 തസ്തികകൾ കമ്പ്യൂട്ടർ ആപ്ലിക്കേഷൻ വിഭാഗത്തിലേക്ക് മാറ്റിയത്.

‘എൻഗേജ്ഡ്’ അധ്യാപകരും അവകാശങ്ങളും

തസ്തിക നിർണ്ണയം വൈകിയതിനാൽ മാനേജ്‌മെന്റ് ഔദ്യോഗിക നിയമന ഉത്തരവ് നൽകിയിട്ടില്ലെന്നും, നെറ്റ് (NET) യോഗ്യതയില്ലെന്നും ചൂണ്ടിക്കാട്ടിയാണ് സർക്കാർ ഹർജിക്കാരിയുടെ ആനുകൂല്യം നിഷേധിച്ചത്. എന്നാൽ, ‘എൻഗേജ്ഡ്’ (Engaged) എന്ന വാക്കിന്റെ നിയമപരമായ വ്യാപ്തി വിശദീകരിച്ചുകൊണ്ട് കോടതി ഈ വാദങ്ങൾ തള്ളി.

വെബ്സ്റ്റേഴ്സ് നിഘണ്ടുവും സർവീസ് ചട്ടങ്ങളും ഉദ്ധരിച്ചുകൊണ്ട്, സ്ഥാപനത്തിൽ ജോലി ചെയ്യുകയും വേതനം കൈപ്പറ്റുകയും ചെയ്യുന്ന ഏതൊരാളും ‘Engaged’ എന്ന പദത്തിന്റെ പരിധിയിൽ വരുമെന്ന് കോടതി നിരീക്ഷിച്ചു. കോളേജ് ഹാൻഡ് ബുക്കുകളിലും കമ്മറ്റികളിലും യൂണിവേഴ്സിറ്റി പരീക്ഷാ ചുമതലകളിലും ഹർജിക്കാരി പങ്കാളിയാണെന്ന രേഖകൾ കോടതി അംഗീകരിച്ചു. 2004 മുതൽ തടസ്സമില്ലാതെ സേവനം അനുഷ്ഠിച്ച ഹർജിക്കാരിക്ക് 2010-ലെ ഉത്തരവിന്റെ (Ext.P2) ആനുകൂല്യത്തിന് പൂർണ്ണ അവകാശമുണ്ടെന്ന് വ്യക്തമാക്കി.

നെറ്റ് (NET) യോഗ്യതയിലെ ഇളവ്

കമ്പ്യൂട്ടർ സയൻസ് അധ്യാപകർക്ക് നെറ്റ് യോഗ്യത വേണമെന്ന വ്യവസ്ഥയിൽ സർക്കാർ തന്നെ 2019-ൽ ഇളവ് നൽകിയിട്ടുണ്ടെന്ന് (G.O.(Ms) No.150/2019/H.Edn – Ext.P8) കോടതി ചൂണ്ടിക്കാട്ടി. 26.11.2012-ന് മുൻപ് നിയമനം ലഭിച്ച അസിസ്റ്റന്റ് പ്രൊഫസർമാർക്ക് നെറ്റ് യോഗ്യതയിൽ നിന്ന് സ്ഥിരമായി ഇളവ് നൽകിയിട്ടുള്ളതിനാൽ, 2004 മുതൽ സേവനത്തിലുള്ള ഹർജിക്കാരിക്കും ഈ ആനുകൂല്യത്തിന് അർഹതയുണ്ടെന്ന് ഉത്തരവിൽ പറഞ്ഞു.

മാതൃകാ തൊഴിൽദാതാവായി സർക്കാർ പ്രവർത്തിക്കണം

2026-ലെ സുപ്രീം കോടതിയുടെ സുപ്രധാന വിധിയായ ‘ഭോലാ നാഥ് വി. ഝാർഖണ്ഡ് സംസ്ഥാനം’ [2026 SCC OnLine SC 129] കേസ് ഉദ്ധരിച്ചുകൊണ്ട്, താത്കാലിക അടിസ്ഥാനത്തിലാണെങ്കിലും ദീർഘകാലം സേവനമനുഷ്ഠിക്കുന്ന ജീവനക്കാർക്ക് സേവനം സ്ഥിരപ്പെടുത്തുമെന്ന ന്യായമായ പ്രതീക്ഷയ്ക്ക് അവകാശമുണ്ടെന്ന് ജസ്റ്റിസ് ഹരിശങ്കർ വി. മേനോൻ ഓർമ്മിപ്പിച്ചു.

തങ്ങളുടെ യൗവനം മുഴുവൻ പൊതുസേവനത്തിനായി വിനിയോഗിച്ച ജീവനക്കാരെ, പ്രായപരിധി കാരണം മറ്റ് തൊഴിലവസരങ്ങൾ ഇല്ലാതാകുന്ന 49-ാം വയസ്സിൽ ഉപേക്ഷിക്കുന്നത് നീതികേടാണ്. മാതൃകാ തൊഴിൽദാതാവ് എന്ന നിലയിൽ ജീവനക്കാരോട് നീതിപൂർവ്വം പെരുമാറാൻ സർക്കാരിന് ബാധ്യതയുണ്ടെന്ന് വ്യക്തമാക്കിയാണ് ഹൈക്കോടതി ഹർജി പൂർണ്ണമായി അനുവദിച്ചത്.