ന്യൂഡൽഹി: ഇന്ത്യയിൽ രജിസ്റ്റർ ചെയ്തതും മോട്ടോർ വാഹന നിയമപ്രകാരം വിദേശ യാത്രയ്ക്ക് വാലിഡായ പെർമിറ്റുമുള്ള വാഹനം അയൽരാജ്യമായ നേപ്പാളിൽ വെച്ച് അപകടത്തിൽപ്പെട്ടാൽ, അതിന് ഇൻഷുറൻസ് കമ്പനി തന്നെ നഷ്ടപരിഹാരം നൽകണമെന്ന് സുപ്രീം കോടതി ഉത്തരവിട്ടു. പോളിസിയിൽ ‘അഡീഷണൽ പ്രീമിയം’ അടച്ചില്ലെന്നോ ‘ഭൂമിശാസ്ത്രപരമായ പരിധി’ (Geographical Area) ഇന്ത്യയിൽ മാത്രം പരിമിതമാണെന്നോ ഉള്ള കാരണം പറഞ്ഞ് ഇൻഷുറൻസ് കമ്പനിക്ക് ഉത്തരവാദിത്തത്തിൽ നിന്ന് ഒഴിവാകാനാവില്ലെന്ന് പരമോന്നത കോടതി വ്യക്തമാക്കി.

ഓറിയന്റൽ ഇൻഷുറൻസ് കമ്പനി ലിമിറ്റഡ് സമർപ്പിച്ച സിവിൽ അപ്പീൽ (Civil Appeal No. of 2026 @ SLP(C) No. 20645/2025) തള്ളിക്കൊണ്ടാണ് ജസ്റ്റിസ് സഞ്ജയ് കരോൾ, ജസ്റ്റിസ് എൻ. കോടീശ്വർ സിങ് എന്നിവരടങ്ങിയ ഡിവിഷൻ ബെഞ്ചിന്റെ ചരിത്രപ്രധാനമായ ഈ ഉത്തരവ്.

“ഇൻഷുറൻസ് പോളിസികൾ കമ്പനികൾ തങ്ങൾക്ക് അനുകൂലമായി ഏകപക്ഷീയമായി എഴുതിയുണ്ടാക്കുന്നതാണ്. അതിലെ അവ്യക്തത കാരണം സാധാരണ പോളിസിയുടമകൾ ദുരിതത്തിലാകാൻ അനുവദിക്കാനാവില്ല.” – സുപ്രീം കോടതി

കേസിന്റെ പശ്ചാത്തലം: ഛത്തീസ്ഗഢിലെ ദുർഗിൽ നിന്ന് നേപ്പാളിലെ തീർത്ഥാടന കേന്ദ്രങ്ങളിലേക്ക് പോയ ‘ദുർഗ് റോഡ്‌വേയ്‌സ് പ്രൈവറ്റ് ലിമിറ്റഡിന്റെ’ ഉടമസ്ഥതയിലുള്ള ബസ് (CG-07/LP-0344) മലയിടുക്കിലേക്ക് മറിഞ്ഞ് ഡ്രൈവർ റിയാസ് ഖാൻ, ഹരീഷ് യാദവ് എന്നിവരുൾപ്പെടെ മൂന്ന് പേർ മരണപ്പെടുകയായിരുന്നു.

മരിച്ച ഹരീഷ് യാദവിന്റെ ഭാര്യയും മക്കളും അമ്മയും ചേർന്ന് 48,99,776 രൂപ നഷ്ടപരിഹാരം ആവശ്യപ്പെട്ട് ട്രൈബ്യൂണലിനെ സമീപിച്ചു. 2015 മാർച്ചിൽ 4th അഡീഷണൽ മോട്ടോർ ആക്സിഡന്റ് ക്ലെയിംസ് ട്രൈബ്യൂണൽ (MACT) 32,67,000 രൂപ നഷ്ടപരിഹാരം വിധിച്ചെങ്കിലും തുക നൽകാനുള്ള ബാധ്യത വാഹന ഉടമയ്ക്കാണ് എന്ന് ഉത്തരവിട്ടു.

തുടർന്ന് വാഹന ഉടമ നൽകിയ അപ്പീലിൽ ഛത്തീസ്ഗഢ് ഹൈക്കോടതി (Bilaspur) ട്രൈബ്യൂണൽ വിധി റദ്ദാക്കുകയും ഇൻഷുറൻസ് കമ്പനിയാണ് തുക നൽകേണ്ടതെന്ന് വിധിക്കുകയും ചെയ്തു. ഇതിനെതിരെയാണ് ഓറിയന്റൽ ഇൻഷുറൻസ് സുപ്രീം കോടതിയെ സമീപിച്ചത്.