കോടതി നടപടികളുടെ ഓഡിയോ, വീഡിയോ റെക്കോർഡിംഗുകൾ അനുമതിയില്ലാതെ സോഷ്യൽ മീഡിയ പ്ലാറ്റ്‌ഫോമുകളിലും ഡിജിറ്റൽ മാധ്യമങ്ങളിലും റീപോസ്റ്റ് ചെയ്യുന്നതും, എഡിറ്റ് ചെയ്ത് പ്രചരിപ്പിക്കുന്നതും, സാമ്പത്തിക ലാഭത്തിനായി ഉപയോഗിക്കുന്നതും (Monetisation) തടഞ്ഞുകൊണ്ട് സുപ്രീം കോടതി ഇടക്കാല ഉത്തരവ് പുറപ്പെടുവിച്ചു. സുപ്രീം കോടതിയുടെയോ അതത് ഹൈക്കോടതികളുടെയോ മുൻകൂർ അനുമതിയില്ലാതെ ഇത്തരം ദൃശ്യങ്ങൾ ശേഖരിക്കാനോ പ്രചരിപ്പിക്കാനോ പാടില്ലെന്ന് ചീഫ് ജസ്റ്റിസ് സൂര്യ കാന്ത്, ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ ബെഞ്ച് ഉത്തരവിട്ടു.

അതേസമയം, കോടതി നടപടികളെക്കുറിച്ചുള്ള മാധ്യമങ്ങളുടെ പതിവ് വാർത്താ റിപ്പോർട്ടിംഗിന് (News Reporting) ഈ വിലക്ക് ബാധകമല്ലെന്ന് സുപ്രീം കോടതി വ്യക്തമാക്കിയത് മാധ്യമലോകത്തിന് ആശ്വാസമായി.

മാധ്യമപ്രവർത്തകയായ ഹർഷിത ഗ്രോവർ സമർപ്പിച്ച പൊതുതാൽപ്പര്യ ഹർജി (W.P.(C) No. 751/2026) പരിഗണിച്ചാണ് സുപ്രീം കോടതിയുടെ ഈ നിർണ്ണായകമായ ഇടക്കാല ഉത്തരവ്. കോടതി മുറിയിലെ സംഭാഷണങ്ങൾ സന്ദർഭത്തിൽ നിന്ന് വേർപെടുത്തി, എഡിറ്റ് ചെയ്ത് പ്രചരിപ്പിക്കുന്നത് ജുഡീഷ്യറിയുടെ അന്തസ്സിനെ ബാധിക്കുന്നുവെന്നും നീതിന്യായ വ്യവസ്ഥയിലുള്ള ജനങ്ങളുടെ വിശ്വാസം തകർക്കുന്നുവെന്നും ഹർജിയിൽ ചൂണ്ടിക്കാണിച്ചിരുന്നു.

ഹൈക്കോടതികൾക്കും കേന്ദ്രത്തിനും നോട്ടീസ്

ഹർജിയിൽ എല്ലാ ഹൈക്കോടതികളെയും സുപ്രീം കോടതി കക്ഷികളാക്കി നോട്ടീസ് അയച്ചു. തത്സമയ സംപ്രേഷണ മാർഗ്ഗനിർദ്ദേശങ്ങൾ നടപ്പിലാക്കിയതിന്റെ വിവരങ്ങളും, തുടർച്ചയായ ലൈവ് സ്ട്രീമിംഗ് ഉണ്ടാക്കുന്ന പ്രത്യാഘാതങ്ങളും വ്യക്തമാക്കിക്കൊണ്ട് റിപ്പോർട്ട് നൽകാൻ ഹൈക്കോടതികളോട് ആവശ്യപ്പെട്ടിട്ടുണ്ട്.

ഇത്തരം റീലുകളും ക്ലിപ്പുകളും തടയുന്നതിന് ഉചിതമായ മന്ത്രാലയങ്ങളെ കണ്ടെത്തി ശുപാർശ സമർപ്പിക്കാൻ കേന്ദ്ര സർക്കാരിനോട് സുപ്രീം കോടതി നിർദ്ദേശിച്ചു. കൂടാതെ സോഷ്യൽ മീഡിയ പ്ലാറ്റ്‌ഫോമുകളായ മെറ്റ (Meta), X (ട്വിറ്റർ) എന്നിവർക്കും കോടതി നോട്ടീസ് അയച്ചിട്ടുണ്ട്.

എഐ വില്ലനാകുന്നു: സോളിസിറ്റർ ജനറൽ

ഹർജിക്കാർക്ക് വേണ്ടി ഹാജരായ മുതിർന്ന അഭിഭാഷകൻ വികാസ് സിംഗ് ലൈവ് സ്ട്രീമിംഗിനെ എതിർക്കുന്നില്ലെന്ന് വ്യക്തമാക്കി. എന്നാൽ, ലൈവ് ദൃശ്യങ്ങൾ വെട്ടിമുറിച്ച് തെറ്റായ തലക്കെട്ടുകളോടെ വൈറലാക്കുന്നതിനെയാണ് എതിർക്കുന്നതെന്ന് അദ്ദേഹം പറഞ്ഞു. ജസ്റ്റിസ് വിശ്വനാഥന്റെ ബെഞ്ചിന് മുന്നിലുണ്ടായ സംഭവങ്ങൾ തെറ്റായ രീതിയിൽ പ്രചരിപ്പിക്കപ്പെട്ടത് ചൂണ്ടിക്കാട്ടിയ അദ്ദേഹം, ഇത് ജുഡീഷ്യറിയെ പൊതുജനമധ്യത്തിൽ പരിഹാസ്യമാക്കുന്നുവെന്ന് ഉത്കണ്ഠ പ്രകടിപ്പിച്ചു.

ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യ സൃഷ്ടിക്കുന്ന ഭീഷണിയെക്കുറിച്ച് കേന്ദ്രത്തിന് വേണ്ടി ഹാജരായ സോളിസിറ്റർ ജനറൽ തുഷാർ മേത്ത മുന്നറിയിപ്പ് നൽകി.

“കോടതി 24 മണിക്കൂർ വിനോദ ചാനലല്ല”

ഡിജിറ്റൽ വിവരങ്ങൾ നിയന്ത്രിക്കുക എന്നത് വലിയ വെല്ലുവിളിയാണെന്ന് ജസ്റ്റിസ് ജോയ്മാല്യ ബാഗ്ചി നിരീക്ഷിച്ചു. ലൈവ് സ്ട്രീമിംഗ് പൊതുനിയമമാക്കാതെ അപൂർവ്വമായ ഒന്നാക്കി മാറ്റണമെന്നും അദ്ദേഹം അഭിപ്രായപ്പെട്ടു.

“കോടതി നടപടികൾ 24 മണിക്കൂറും പ്രവർത്തിക്കുന്ന വിനോദ ചാനലല്ല. കേസ് കാണണമെന്ന് ആഗ്രഹിക്കുന്ന കക്ഷികൾ പ്രത്യേക അപേക്ഷ നൽകുന്ന രീതി ആലോചിക്കണം,” എന്ന് ജസ്റ്റിസ് ബാഗ്ചി നിരീക്ഷിച്ചു.

തുടർന്ന്, കേസിൽ വിശദമായ മാർഗ്ഗനിർദ്ദേശങ്ങൾ പുറപ്പെടുവിക്കുന്നതിനായി കേസ് കൂടുതൽ വാദം കേൾക്കുന്നതിനായി മാറ്റി. ഹർജിക്കാർക്ക് വേണ്ടി മുതിർന്ന അഭിഭാഷകൻ ഡോ. വികാസ് സിംഗിനോടൊപ്പം അഡ്വ. എം.ഡി ഇമ്രാൻ അഹമ്മദ്, ആർ. ജൂഡ് രോഹിത്, ദക്ഷ് സച്ച്ദേവ തുടങ്ങിയവർ ഹാജരായി.