ന്യൂഡൽഹി: ശിക്ഷ അനുഭവിക്കുന്ന വയോധികരും മാരകരോഗികളുമായ തടവുകാരുടെ മോചനത്തിനും മാനുഷിക പരിചരണത്തിനുമായി വിപ്ലവാത്മക ഉത്തരവുമായി സുപ്രീം കോടതി. 70 വയസ്സ് പിന്നിട്ടവർക്കും, മാരകമായ രോഗങ്ങൾ മൂലം കഷ്ടപ്പെടുന്നവർക്കും കരുണാമോചനമോ ജാമ്യമോ നൽകുന്നതിന് മൂന്ന് മാസത്തിനുള്ളിൽ വ്യക്തമായ സമഗ്ര നയം രൂപീകരിക്കാൻ എല്ലാ സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും സുപ്രീം കോടതി കർശന നിർദ്ദേശം നൽകി.

നാഷണൽ ലീഗൽ സർവീസസ് അതോറിറ്റി (NALSA) സമർപ്പിച്ച ഹർജിയിലാണ് ജസ്റ്റിസ് വിക്രം നാഥ്, ജസ്റ്റിസ് സന്ദീപ് മേത്ത എന്നിവരടങ്ങിയ ബെഞ്ച് ചരിത്രപരമായ ഉത്തരവ് പുറപ്പെടുവിച്ചത്. ജയിലിൽ അടയ്ക്കപ്പെട്ടു എന്നതുകൊണ്ട് ഭരണഘടന ഉറപ്പുനൽകുന്ന വ്യക്തിസ്വാതന്ത്ര്യവും അന്തസ്സോടെ ജീവിക്കാനുള്ള അവകാശവും (Article 21) റദ്ദാക്കപ്പെടുന്നില്ലെന്ന് കോടതി വീണ്ടും അടിവരയിട്ടു.

“ഒരു ജനാധിപത്യ ഭരണകൂടം അതിന്റെ ഭരണസംവിധാനത്തിലെ ഏറ്റവും ദുർബലരോട് എങ്ങനെ പെരുമാറുന്നു എന്നതിലാണ് ആ രാജ്യത്തിന്റെ നിയമവാഴ്ചയും മാനവികതയും വെളിപ്പെടുന്നത്. ജയിലുകൾ ശിക്ഷ നടപ്പാക്കാനുള്ള കേന്ദ്രങ്ങളാണെങ്കിലും ഭരണഘടനാ മൂല്യങ്ങൾ റദ്ദാക്കപ്പെടുന്ന ഇടങ്ങളല്ല.” — ജസ്റ്റിസ് സന്ദീപ് മേത്ത (വിധിന്യായത്തിൽ നിന്ന്)

തടവറകൾ ക്രൂരവും മനുഷ്യത്വരഹിതവുമായ പീഡന കേന്ദ്രങ്ങളായി മാറുമ്പോൾ ശിക്ഷയുടെ അടിസ്ഥാന ലക്ഷ്യം തന്നെ തകരുകയാണ്. മതിയായ വൈദ്യസഹായം ലഭിക്കാതെയും വാർദ്ധക്യ സഹജമായ അസുഖങ്ങളാൽ ബുദ്ധിമുട്ടിയും നിരവധി തടവുകാരാണ് തടവറകളിൽ കഴിയുന്നത്. ഇവരെ കുറിച്ച് നൽസ (NALSA) നടത്തിയ രാജ്യവ്യാപക പരിശോധനയിലാണ് ഞെട്ടിക്കുന്ന വിവരങ്ങൾ പുറത്തുവന്നത്.

ഡിജിറ്റൽ നീതിയും ഇ-പ്രിസൺസ് പോർട്ടലും

തടവുകാരുടെ മോചന അപേക്ഷകൾ വൈകുന്നത് ഒഴിവാക്കാൻ കേന്ദ്ര സർക്കാരിന്റെ e-Prisons Portal മായി ഈ പ്രക്രിയ പൂർണ്ണമായും സംയോജിപ്പിക്കും. ഇലക്ട്രോണിക്സ് ആൻഡ് ഐ.ടി മന്ത്രാലയത്തിന്റെ (MeitY) കീഴിലുള്ള നാഷണൽ ഇൻഫോർമാറ്റിക്സ് സെന്ററിന് (NIC) ഇതിനായി പ്രത്യേക ഡിജിറ്റൽ സംവിധാനം വികസിപ്പിക്കാൻ നിർദ്ദേശം നൽകി.

ഓരോ അപേക്ഷയ്ക്കും ഒരു ഡിജിറ്റൽ ട്രാക്കിംഗ് നമ്പർ നൽകും. മെഡിക്കൽ ബോർഡിന്റെ റിപ്പോർട്ട്, ജയിൽ അധികൃതരുടെ ശുപാർശ, അണ്ടർ ട്രയൽ റിവ്യൂ കമ്മിറ്റിയുടെ (UTRC) നിർദ്ദേശം എന്നിവ ഇതിൽ തത്സമയം രേഖപ്പെടുത്തും. കൃത്യസമയത്ത് നടപടി പൂർത്തിയാകാത്ത പക്ഷം സോഫ്റ്റ്‌വെയർ സ്വയം മുന്നറിയിപ്പ് നൽകുന്ന സംവിധാനവും ഇതിലുണ്ടാകും.