ആപ്പ് വികസനവുമായി ബന്ധപ്പെട്ട് വർഷങ്ങളായി നിലനിൽക്കുന്ന തർക്കത്തിൽ അപ്പീൽ കക്ഷിയായ ലെവിറ്റേറ്റ് മൊബൈൽ കമ്പനിക്ക് സുപ്രീം കോടതിയിൽ വലിയ തിരിച്ചടി. സുദീർഘമായ സിവിൽ വ്യവഹാരത്തിനിടയിൽ പുതിയ തെളിവുകളും ഇ-മെയിലുകളും ഹാജരാക്കാൻ അനുവദിക്കണമെന്ന കമ്പനിയുടെ ആവശ്യം ജസ്റ്റിസ് സഞ്ജയ് കരോൾ തലവനായ സുപ്രീം കോടതി ഡിവിഷൻ ബെഞ്ച് തള്ളി. 2015 മുതൽ ഇഴഞ്ഞുനീങ്ങുന്ന വാണിജ്യ കേസ് അന്തിമഘട്ടത്തിലെത്തിയ ശേഷം വീണ്ടും രേഖകൾ ഹാജരാക്കുന്നത് ‘അപക്വമായ നടപടി’ എന്ന് സുപ്രീം കോടതി നിരീക്ഷിച്ചു.

തർക്കത്തിന്റെ തുടക്കം: 2013 ഫെബ്രുവരി 19-നാണ് പ്രമുഖ പണമിടപാട് സ്ഥാപനമായ സ്റ്റാൻഡേർഡ് ചാർട്ടേഡ് ബാങ്കും (SCB) ലെവിറ്റേറ്റ് മൊബൈൽ ടെക്നോളജീസും (LMT) തമ്മിൽ മൊബൈൽ ആപ്പ് നിർമ്മിക്കാനുള്ള ഐടി പ്രൊഫഷണൽ കരാറിലേർപ്പെടുന്നത്. ഏറെ ശ്രമങ്ങൾക്കൊടുവിൽ ആൻഡ്രോയിഡ്, ഐഒഎസ് പ്ലാറ്റ്‌ഫോമുകളിൽ ആപ്പ് വിജയകരമായി പുറത്തിറക്കിയെങ്കിലും തൊട്ടുപിന്നാലെ ആപ്പ് പിൻവലിക്കാൻ ബാങ്ക് നിർദ്ദേശം നൽകി.

ആപ്പിൽ നിന്നുള്ള വരുമാനം പങ്കിടുന്നതിലെ നഷ്ടം കാരണം ലെവിറ്റേറ്റ് കമ്പനി നിയമപരമായ നടപടികളിലേക്ക് നീങ്ങി. 4.46 കോടി രൂപയും 18% പലിശയും ആവശ്യപ്പെട്ട് 2015 ഏപ്രിൽ 15-ന് വക്കീൽ നോട്ടീസ് അയച്ചു. തുക നൽകാൻ ബാങ്ക് വിസമ്മതിച്ചതോടെ ഡൽഹി ഹൈക്കോടതിയിൽ സിവിൽ കേസ് ഫയൽ ചെയ്തു. 2018 ജനുവരി 30-ന് ഡൽഹി ഹൈക്കോടതി ഇത് കൊമേർഷ്യൽ കേസായി റീ-നമ്പർ ചെയ്തു.

ഹൈക്കോടതി വിധി സുപ്രീംകോടതി ശരിവെച്ചു: 2023-ൽ കേസിലെ ആദ്യത്തെ സാക്ഷിയായ സുനിൽ ജസൂജയുടെ മൊഴി പൂർത്തിയായിരുന്നു. തുടർന്ന് ലെവിറ്റേറ്റ് കമ്പനി തങ്ങളുടെ കയ്യിലുണ്ടായിരുന്ന ഇ-മെയിലുകൾ, മറ്റ് പങ്കാളികളുമായുള്ള കരാർ പകർപ്പുകൾ എന്നിവ ഹാജരാക്കാനും വീണ്ടും സാക്ഷിയെ വിസ്തരിക്കാനും പ്രത്യേക അപേക്ഷ നൽകി. എന്നാൽ, ഡൽഹി ഹൈക്കോടതി ഇത് തള്ളി. ഇതിനെതിരെയാണ് ലെവിറ്റേറ്റ് സുപ്രീംകോടതിയെ സമീപിച്ചത്.

തങ്ങളുടെ ഭാഗത്തുണ്ടായ കാലതാമസം ‘ന്യായമായ കാരണം’ (Reasonable cause) കൊണ്ടാണെന്നും, വലിയ അളവിൽ ഇ-മെയിൽ ആശയവിനിമയങ്ങൾ പരിശോധിക്കേണ്ടി വന്നതു കൊണ്ടാണ് വൈകിയതെന്നും അപ്പീൽ കക്ഷി കോടതിയിൽ വാദിച്ചു. എന്നാൽ തർക്കങ്ങൾ തവണകളായി പരിഹരിക്കുന്ന ഈ രീതി പ്രോത്സാഹിപ്പിക്കാനാകില്ലെന്ന് പരമോന്നത നീതിപീഠം വ്യക്തമാക്കി. 2015 മുതൽ 2026 വരെ നീണ്ടുപോയ ഒരു കേസ് ഇനി കൂടുതൽ കാലതാമസത്തിന് അനുവദിക്കില്ലെന്ന് ഉത്തരവിട്ടു.