കൊച്ചി: ഉന്നത വിദ്യഭ്യാസ ആവശ്യങ്ങൾക്കായി അധികൃതരുടെ മുൻകൂർ അനുമതി ലഭിക്കാതെ ജോലിയിൽ നിന്നും വിട്ടുനിന്ന ഇ.എസ്.ഐ.സി (ESIC) ഡോക്ടറുടെ സർവീസ് അച്ചടക്ക ലംഘനം സാധൂകരിച്ചും അവധി തിരുത്തി അനുവദിച്ചും സെൻട്രൽ അഡ്മിനിസ്ട്രേറ്റീവ് ട്രിബ്യൂണൽ (CAT) പുറപ്പെടുവിച്ച ഉത്തരവ് കേരള ഹൈക്കോടതി റദ്ദാക്കി. അച്ചടക്ക ലംഘനത്തിന് ശിക്ഷിക്കപ്പെട്ട ശേഷം, അനാധികൃതമായി വിട്ടുനിന്ന കാലയളവ് ‘ഉന്നത സാങ്കേതിക ശാസ്ത്രീയ പഠനാവധിയായി’ (Extraordinary leave for higher studies) ക്രമീകരിച്ചു നൽകാൻ സാധിക്കില്ലെന്ന് കോടതി വ്യക്തമാക്കി.

എംപ്ലോയീസ് സ്റ്റേറ്റ് ഇൻഷുറൻസ് കോർപ്പറേഷൻ (ESIC) ഡയറക്ടർ ജനറലും മറ്റ് ഉദ്യോഗസ്ഥരും സമർപ്പിച്ച ഒ.പി (CAT) നമ്പർ 82/2026 ഹർജി അനുവദിച്ചുകൊണ്ടാണ് ജസ്റ്റിസ് കെ. നടരാജൻ, ജസ്റ്റിസ് ജോൺസൺ ജോൺ എന്നിവരടങ്ങിയ ഡിവിഷൻ ബെഞ്ചിന്റെ നിർണ്ണായക വിധി പ്രസ്താവം.

കേസിന്റെ പശ്ചാത്തലം:

കൊല്ലം ആശ്രാമം ഇ.എസ്.ഐ.സി മോഡൽ ആൻഡ് സൂപ്പർ സ്പെഷ്യാലിറ്റി ഹോസ്പിറ്റലിലെ ഇൻഷുറൻസ് മെഡിക്കൽ ഓഫീസർ ഗ്രേഡ്-2 ആയി ജോലി ചെയ്തു വരികയായിരുന്ന ഡോ. പ്രീതി സി.ജെ. 2013 ഓഗസ്റ്റ് 31 മുതൽ രണ്ടു വർഷത്തെ പി.ജി ഡിപ്ലോമ ഇൻ അനസ്ത്യേഷ്യോളജി (DA) കോഴ്സിന് ചേരുന്നതിനായി പഠനാവധിക്ക് അപേക്ഷ സമർപ്പിച്ചിരുന്നു. കൺട്രോളിംഗ് ഓഫീസർ അപേക്ഷ ശുപാർശ ചെയ്തെങ്കിലും അധികൃതർ അവധി ഔദ്യോഗികമായി അനുവദിച്ചിരുന്നില്ല.

തുടർന്ന് അപേക്ഷയിൽ അന്തിമ തീരുമാനമാകുന്നതിന് മുൻപ് തന്നെ ഡോക്ടർ കോഴ്സിൽ ചേരുകയും ജോലിയിൽ നിന്ന് വിട്ടുനിൽക്കുകയും ചെയ്തു. എന്നാൽ 2014 ഡിസംബർ 1 ലെ മെമ്മോ പ്രകാരം ഈ വിട്ടുനിൽക്കൽ ‘അനാധികൃത അസാന്നിധ്യം’ (Unauthorized absence) ആയി കണക്കാക്കുമെന്ന് കോർപ്പറേഷൻ അറിയിക്കുകയായിരുന്നു.

അച്ചടക്ക നടപടിയും പിഴവും:

തുടർന്ന് ഡോക്ടർക്കെതിരെ അച്ചടക്ക ലംഘനത്തിന് വകുപ്പുതല അന്വേഷണം പ്രഖ്യാപിക്കുകയും, 2019 നവംബർ 14 ലെ ഉത്തരവ് പ്രകാരം ശിക്ഷാനടപടിയായി 3 വർഷത്തേക്ക് 3 ഇൻക്രിമെന്റുകൾ തടയുകയും (Stoppage of 3 increments) ചെയ്തു. ശിക്ഷാ നടപടി ഡോക്ടർ നിയമപരമായി ചോദ്യം ചെയ്തിരുന്നില്ല.

ശിക്ഷ റദ്ദാക്കാതിരുന്ന സാഹചര്യത്തിൽ, അനാധികൃതമായി വിട്ടുനിന്ന കാലയളവ് (31.08.2013 – 30.10.2015, 03.03.2016 – 02.03.2018) പഠനാവശ്യങ്ങൾക്കായുള്ള പ്രത്യേക അവധിയായി ക്രമീകരിക്കണമെന്ന് ആവശ്യപ്പെട്ട് 2019 ഡിസംബറിൽ ഡോക്ടർ വീണ്ടും അപേക്ഷ നൽകി. എന്നാൽ ഇ.എസ്.ഐ അധികൃതർ ഇത് ‘വ്യക്തിഗത ആവശ്യങ്ങൾക്കായുള്ള അവധി’ (Extraordinary leave for personal purposes) ആയി മാത്രമേ അംഗീകരിക്കാൻ സാധിക്കൂ എന്ന് 2020 മെയ് 12-ന് വ്യക്തമാക്കുകയായിരുന്നു.

ക്യാറ്റിലെ (CAT) വിധിയും ഹൈക്കോടതിയുടെ ഇടപെടലും:

ഈ തീരുമാനത്തിനെതിരെ ഡോക്ടർ നൽകിയ ഹർജിയിൽ, അനാധികൃത അസാന്നിധ്യം ഉന്നത സാങ്കേതിക ശാസ്ത്രീയ പഠനത്തിനുള്ള അവധിയായി മാറ്റി ക്രമീകരിക്കാനും പ്രൊമോഷൻ, പെൻഷൻ, കുടിശ്ശിക തുടങ്ങിയ സർവീസ് ആനുകൂല്യങ്ങൾ നൽകാനും ട്രിബ്യൂണൽ വിധി പ്രസ്താവിച്ചു. ഇതിനെതിരെയാണ് ഇ.എസ്.ഐ.സി ഹൈക്കോടതിയിൽ റിട്ട് ഹർജി സമർപ്പിച്ചത്.

ഹൈക്കോടതി ഡിവിഷൻ ബെഞ്ച് ഹർജി പരിശോധിച്ചതിൽ പ്രധാനമായും രണ്ട് കാര്യങ്ങൾ ചൂണ്ടിക്കാട്ടി:

ഈ സാഹചര്യത്തിൽ സെൻട്രൽ അഡ്മിനിസ്ട്രേറ്റീവ് ട്രിബ്യൂണൽ അധികാരം ലംഘിച്ചാണ് ഉത്തരവ് പുറപ്പെടുവിച്ചതെന്ന് വിലയിരുത്തിയ ഹൈക്കോടതി, ട്രിബ്യൂണലിന്റെ ഉത്തരവ് പൂർണ്ണമായി റദ്ദാക്കുകയും ഡോക്ടറുടെ ഒ.എ തള്ളുകയും ചെയ്തു.