ന്യൂഡൽഹി: ജുഡീഷ്യൽ സർവീസ് നിയമനങ്ങളിൽ അഭിമുഖത്തിന് (viva-voce) നിശ്ചയിച്ചിട്ടുള്ള മിനിമം യോഗ്യതാ മാർക്ക് (കട്ട് ഓഫ്) സ്വന്തമാക്കാൻ കഴിയാത്ത സ്ഥാനാർത്ഥിക്ക്, എഴുത്തുപരീക്ഷയിൽ ഉയർന്ന മാർക്ക് ലഭിച്ചിട്ടുണ്ടെന്ന ഒറ്റ കാരണത്താൽ നിയമനത്തിന് അവകാശവാദമുന്നയിക്കാനാവില്ലെന്ന് സുപ്രീം കോടതി വ്യക്തമാക്കി. രാജസ്ഥാൻ ഹൈക്കോടതി അഡീഷണൽ ഡിസ്ട്രിക്ട് ജഡ്ജ് (ADJ) തസ്തികയിലേക്ക് നടത്തിയ നിയമനവുമായി ബന്ധപ്പെട്ട ഹർജി തള്ളിക്കൊണ്ടാണ് ജസ്റ്റിസ് സഞ്ജയ് കരോൾ, ജസ്റ്റിസ് പ്രസന്ന ബി. വരാലെ എന്നിവരടങ്ങിയ ഡിവിഷൻ ബെഞ്ചിന്റെ നിർണ്ണായക ഉത്തരവ്.

രാജസ്ഥാൻ ജുഡീഷ്യൽ സർവീസ് ചട്ടം 41 പ്രകാരം അഭിമുഖത്തിന് 25% മാർക്ക് (30-ൽ 7.5 മാർക്ക്) നിർബന്ധമാക്കിയിരുന്നു. എഴുത്തുപരീക്ഷയിൽ 250-ൽ 161 മാർക്ക് (64.4%) നേടി ആകെ മെരിറ്റിൽ 11-ാം റാങ്കിലെത്തിയ അപ്പീൽ വാദി മനോജ് ഗോയലിന് അഭിമുഖത്തിൽ ലഭിച്ചത് 7 മാർക്ക് മാത്രമാണ്. കട്ട് ഓഫ് മാർക്കിന് 0.5 മാർക്ക് തികയാതെ വന്നതോടെ ഇയാളെ നിയമനത്തിന് അയോഗ്യനാക്കി.

എന്തുകൊണ്ട് അഭിമുഖത്തിന് മിനിമം മാർക്ക്?

ജഡ്ജിമാരെ തെരഞ്ഞെടുക്കുന്നതിൽ അഭിമുഖത്തിനുള്ള പ്രാധാന്യം സുപ്രീം കോടതി എടുത്തുപറഞ്ഞു. എഴുത്തുപരീക്ഷ സ്ഥാനാർത്ഥിയുടെ നിയമ വിജ്ഞാനം അളക്കുമ്പോൾ, അഭിമുഖമാണ് വ്യക്തിത്വം, കാര്യപ്രാപ്തി, മാനസിക നിലവാരം, പെട്ടെന്ന് തീരുമാനമെടുക്കാനുള്ള കഴിവ് എന്നിവ വിലയിരുത്തുന്നത്. ഉയർന്ന നീതിപീഠങ്ങളിൽ ഇരിക്കുന്നവർക്ക് അഭിമുഖത്തിൽ മിനിമം യോഗ്യത നിർബന്ധമാക്കുന്നത് സർവീസിന്റെ ഗുണനിലവാരം ഉറപ്പാക്കാൻ അത്യന്താപേക്ഷിതമാണെന്ന് വിധിയിൽ ജസ്റ്റിസ് പ്രസന്ന ബി. വരാലെ ചൂണ്ടിക്കാട്ടി.

ഒരു പതിറ്റാണ്ട് പഴക്കമുള്ള നിയമനങ്ങൾ മാറ്റാനാവില്ല

2011-ൽ വിജ്ഞാപനം ചെയ്ത പരീക്ഷയുടെ അടിസ്ഥാനത്തിൽ നിയമനം ലഭിച്ച ജഡ്ജിമാർ കഴിഞ്ഞ 10 വർഷത്തിലേറെയായി സേവനമനുഷ്ഠിച്ചു വരികയാണ്. ഇപ്പോൾ ഫലം പുനഃക്രമീകരിച്ച് അപ്പീൽ വാദിക്ക് നിയമനം നൽകുന്നത് നിലവിലുള്ള ജഡ്ജിമാരുടെ സീനിയോറിറ്റിയെയും ബാധിക്കും. ഇത് നിയമന പ്രക്രിയയിൽ വലിയ അനിശ്ചിതത്വത്തിനും അനാവശ്യ കേസ് പ്രവാഹങ്ങൾക്കും (Pandora’s box) വഴിവെക്കുമെന്നും സുപ്രീം കോടതി ഓർമ്മിപ്പിച്ചു.

പരീക്ഷ എഴുതുന്ന സമയത്ത് 2011-ലെ ഭേദഗതി ചെയ്ത ചട്ടങ്ങൾ അപ്പീൽ വാദിക്ക് അറിയാമായിരുന്നു. നിബന്ധനകൾ അംഗീകരിച്ച് പരീക്ഷ എഴുതി തോറ്റ ശേഷം, ആ ചട്ടങ്ങൾ തെറ്റാണെന്ന് വാദിക്കുന്നത് എസ്റ്റോപ്പൽ തത്വത്തിന് വിരുദ്ധമാണെന്നും കോടതി വ്യക്തമാക്കി.